ПЕКИН, 10 июль. /“Дунё” АА/. Хитойнинг Фуцзянь провинциясидаги “Huiteng Shoes” компаниясига қарашли пойабзал фабрикасида чиққан ёнғин оқибатда 28 киши ҳалок бўлди, деб хабар бермоқда “Дунё” АА мухбири “Синьхуа” ахборот агентлиги маълумотига таяниб.

Фабрикадаги ёнғин 9 июль куни туш пайтида бошланган. Ёнғин бошланган вақтда корхонада 237 нафар ишчи ва икки нафар етказиб бериш хизмати ходими бўлган. 213 киши эвакуация қилинган, улардан икки нафари шифохонада вафот этган. Шунингдек, бедарак йўқолган деб ҳисобланган 26 кишининг ҳам ҳалок бўлгани тасдиқланди.

Қутқарув амалиётига 500 дан ортиқ ўт ўчирувчи жалб этилди. Фуцзянь провинцияси ҳукумати фавқулодда вазият оқибатларини бартараф этиш, ҳодиса тафсилотларини ўрганиш ва айбдорларни аниқлаш учун штаб тузди. Штаб ихтиёрига бешта ишчи гуруҳи бириктирилди.

Полиция эҳтиётсизликда гумон қилинган компания эгаси ва яна бир неча мансабдор шахсни ҳибсга олди. Компаниянинг корпоратив ҳисобварақлари музлатиб қўйилди.

Эслатиб ўтамиз, сўнгги кунларда Хитой ноқулай об-ҳаво шароитлари – сув тошқинлари, момақалдироқ ва кўчкиларга дуч келмоқда. Ушбу табиий офатлар мамлакат бўйлаб 36 дан ортиқ кишининг ўлимига сабаб бўлди.