ТОШКЕНТ, 16 июнь./"Дунё" АА/. Исроил ва Эрон ўртасидаги можаро тўрт кундан бери давом этмоқда ва ҳар икки томон ҳам ҳужумларни кучайтирмоқда, деб хабар беряпти "Дунё" АА мухбири.

Эрон Соғлиқни сақлаш вазирлиги сўнгги уч кун ичида Исроилнинг мамлакатга берган зарбалари натижасида 244 киши ҳалок бўлганини тасдиқлади. Шунингдек, 1250 дан ортиқ киши турли тан жароҳатлари билан шифохоналарга ётқизилгани қайд этилди.

Исроилда ҳарбий можаро бошланганидан бери камида 24 киши ҳалок бўлган ва 592 киши яраланган. 16 июнга ўтар кечаси Эрон Исроилнинг Бат-Ям ва Хайфа шаҳарларига, шунингдек, мамлакат пойтахтига зарба берди. АҚШнинг Исроилдаги элчиси Майк Хаккабининг айтишича, Эрон ракетаси Тель-Авивдаги элчихона биноси яқинига келиб тушган ва бинога кичик зарар етказган.

Исроил Мудофаа кучлари (ЦАХАЛ) Эрон разведка хизматининг тўрт нафар юқори мартабали зобитини, жумладан Ислом инқилоби қўриқчилари корпуси разведка бошқармаси бошлиғи, генерал Муҳаммад Казими ҳамда унинг ўринбосари ва яна бир генерални ўлдирганини маълум қилди.

ЦАХАЛ, шунингдек, Теҳрон яқинида "Эрон режимининг ракета учирувчиларининг учдан бир қисми"ни ташкил этувчи камида 120 та ракета учиргични ҳамда у билан ишлаётган қўшинларни йўқ қилганини таъкидламоқда.

Мудофаа вазири Исраэль Кацнинг айтишича, Эрон пойтахти аҳолиси Эроннинг Исроилга қилган ҳалокатли жавоб зарбалари учун "тез орада бадал тўлайди".

Ямандан ракета учирилиши ортидан Исроил Жанубига ҳаво ҳужуми ҳақида огоҳлантириш берилди. Хусийлар жангари гуруҳи Эрон билан келишилган ҳолда Исроилнинг марказий Яффа шаҳрига бир неча баллистик ракета билан зарбалар берганини маълум қилган. Бу гуруҳ Теҳрон билан ҳамкорликни биринчи марта ошкора эълон қилди.

Дастлабки маълумотларга кўра, Исроил журналистларга рухсатсиз чоп этиш тақиқланган мавзулар рўйхатини, жумладан, армия базалари ва ҳарбий инфратузилмага етказилган зарар ҳақидаги маълумотларни юборган.

Эрон Президенти Масуд Пезешкиан парламент йиғилишида сўзга чиқиб, барча эронликларни "бирлашишга, собит бўлишга ва Эрон дуч келаётган жиноий тажовузга қарши туришга" чақирди. Давлат раҳбарининг қайд этишича, Теҳрон томонидан ядро қуроли яратиш тарафдори бўлганларга мамлакат сиёсатида ўрин йўқ.

Эрон ташқи ишлар вазири Аббос Ароқчи "Агар Исроил Теҳронга қарши ҳарбий операцияни тўхтатса, Эрон расмийлари жавоб зарбаларини тўхтатади", деди.

Эрон матбуотига кўра, Эрон томони АҚШ ва Исроил билан алоқаларга воситачилик қилаётган Қатар ва Ўмонга "Исроил зарбаларига дуч келаётган бир пайтда ўт очишни тўхтатиш бўйича музокараларга тайёр эмаслиги" ҳақида маълум қилган.

АҚШ Президенти Дональд Трамп Россия Президенти Владимир Путиннинг ушбу можарода воситачи сифатида иштирок этиш вариантини кўриб чиқишга тайёрлигини айтди. "У менга қўнғироқ қилди. Биз бу ҳақда узоқ вақт гаплашдик", – деди давлат раҳбари ҳамда АҚШнинг Исроил ва Эрон ўртасидаги можарога аралашишини истамаслигини таъкидлади.