ГОНКОНГ, 12 июнь. /“Дунё” АА/. Гонконг ҳукумати 2025 йил ноябрь ойида 168 кишининг ҳаётига зомин бўлган йирик ёнғин иши юзасидан етти нафар жисмоний шахс ва иккита компанияга айблов эълон қилди, деб хабар бермоқда “Дунё” АА мухбири “South China Morning Post” газетасига таяниб.

Тергов маълумотларига кўра, айбланувчиларга эҳтиётсизлик туфайли одам ўлдириш, жиноий тил бириктириш, пул ювиш, одил судловга тўсқинлик қилиш ва солиқ тўлашдан бўйин товлаш каби жами 25 та модда бўйича айблов қўйилган.

Эслатиб ўтамиз, ёнғин 2025 йил 26 ноябрь куни Тай По туманидаги “Wang Fuk Court” турар жой мажмуасида келиб чиққан. Олов еттита кўп қаватли бинони қамраб олиб, Гонконгда сўнгги ўн йилликлар ичидаги энг йирик фожиага сабаб бўлган эди.

Тергов айбланувчилар мажмуани реконструкция қилиш бўйича кенг кўламли лойиҳага алоқадор бўлгани ва иш жараёнида турли вазифаларни бажарганини аниқлади. Шунингдек, лойиҳани назорат қилган консалтинг компанияси ва бош пудратчи ҳам айбловга тортилган.

Аввалроқ, март ойида полиция фожиага алоқадорликда гумон қилинган 38 киши қўлга олинганини маълум қилган эди. Улар орасида эҳтиётсизлик туфайли одам ўлдириш ва фирибгарликда айбланганлар ҳам бор.

Кейинчалик тўққиз нафар шахсга айблов эълон қилинди. Ўша ойда Гонконгнинг Коррупцияга қарши курашиш мустақил комиссияси (ICAC) порахўрлик ва фирибгарлик мақсадида тил бириктирганликда гумонланган яна 23 киши ҳибсга олинганини маълум қилди.

Ёнғин сабабларини ўрганаётган комиссия вакилининг сўзларига кўра, фожиа юз берган куни инсон омили сабабли ёнғинга қарши хавфсизлик тизимларининг деярли барчаси ишламаган.

“AFP” агентлиги сурати