СЕУЛ, 12 июнь. /“Дунё” АА/. Сеул марказий округ суди Жанубий Кореянинг собиқ президенти Юн Сок Ёлни мансаб ваколатини суиистеъмол қилиш ва душман манфаатларини кўзлаб ҳаракат қилишда айбдор деб топиб, 30 йилга озодликдан маҳрум этди, деб хабар бермоқда “Дунё” АА мухбири Жанубий Кореянинг “Yonhap” ахборот агентлиги маълумотига таяниб.

Суднинг аниқлашича, Юн Сок Ёл 2024 йил октябрь ойида икки мамлакат ўртасидаги кескинликни кучайтириш мақсадида КХДР ҳудудига учувчисиз учоқларни киритиш бўйича операция ўтказишга буйруқ берган. Суд хулосасига кўра, вазиятнинг кутилаётган кескинлашуви 2024 йил 3 декабрда ҳарбий ҳолат жорий этилишига асос бўлиши керак эди.

Суд қарорида таъкидланишича, айбланувчилар Шимолий Кореяни провокацияга ундаш ва ҳарбий ҳолат жорий этиш учун баҳона бўла оладиган миллий хавфсизлик инқирозини юзага келтириш мақсадида психологик уруш усулларидан фойдаланишни ният қилган.

Жанубий Кореянинг собиқ мудофаа вазири Ким Ён Хён ҳам операцияда иштирок этгани учун 30 йилга озодликдан маҳрум қилинди. Ҳарбий контрразведка қўмондонлигининг собиқ раҳбари Ё Ин Хён 15 йилга қамалди. Дронлардан фойдаланиш қўмондонлиги собиқ қўмондони Ким Ён Дега эса беш йиллик синов муддати билан уч йил шартли қамоқ жазоси тайинланди.

Суднинг қайд этишича, судланувчиларнинг ҳаракатлари жамиятнинг мамлакат раҳбарияти ва қуролли кучларига бўлган ишончига путур етказган, чунки ҳарбий ресурслар қонуний мақсадларда эмас, балки шахсий сиёсий вазифаларни амалга ошириш учун ишлатилган.

Юн Сок Ёлнинг ҳимоя томони дронлардан фойдаланиш Шимолий Кореянинг 2024 йилда Жанубий Корея томон ҳаво шарларини учирганига жавобан қонуний ҳарбий операция бўлганини таъкидлаб, ҳукм устидан апелляция шикояти бериш ниятини маълум қилди.

Бироқ суд ушбу операция мамлакатнинг ҳарбий имкониятларини фош этиб, КХДРнинг жанговар шайлигини оширишга хизмат қилгани боис Жанубий Кореянинг хавфсизлик манфаатларига зарар етказган, деган хулосага келди.

Бу собиқ президентга нисбатан чиқарилган биринчи айблов ҳукми эмас. Февраль ойида у ҳарбий ҳолат жорий этиш билан боғлиқ исён ишида умрбод озодликдан маҳрум қилинган эди. Бу ҳукм устидан ҳам шикоят қилинган.

“News1” телеканали сурати