ВАШИНГТОН, 12 июнь. /“Дунё” АА/. Йирик тадбиркор Илон Маск дунёда бойлиги 1 триллион АҚШ долларидан ошган илк инсонга айланди, деб хабар бермоқда “Дунё” АА мухбири.

“Reuters” агентлиги ҳисоб-китобларига кўра, бойликнинг кескин ўсиши “SpaceX” компанияси акцияларининг бирламчи оммавий жойлаштируви (IPO) ортидан юз берган. Бу компанияга 75 миллиард доллар келтирган ва Маскнинг сармояси 1,1 триллион доллардан ошган.

Мазкур жойлаштирув технология секторидаги энг йирикларидан бири бўлиб, 2030 йилгача Марсга одам юборишни режалаштираётган Илон Маск лойиҳаларига сармоядорларнинг қизиқиши юқори эканини ифодалайди.

Таъкидлаш жоизки, IPOгача “Forbes” тадбиркорнинг бойлигини тахминан 780 миллиард долларга баҳолаган эди. Активлар қиймати қайта кўриб чиқилиб, “SpaceX” акциялари савдоси бошланганидан сўнг, унинг сармояси сезиларли даражада ошди.

Маск бойлигининг асосий манбаи “SpaceX” бўлиб қолмоқда. Унинг компаниядаги улуши тахминан 866 миллиард долларга баҳоланади. Бойликнинг салмоқли қисмини электромобиль ишлаб чиқарувчи “Tesla” акциялари ва бошқа активлар ташкил этади. Сўнгги йилларда тадбиркорга қўшимча эътиборни 2022 йилда “Twitter” ижтимоий тармоғининг 44 миллиард долларга сотиб олиниши жалб қилди.

Илон Маск жаҳон бизнесида энг кўп муҳокама қилинадиган шахслардан бири бўлиб қолмоқда. Тарафдорлари уни иқтисодиётнинг бутун тармоқларини ўзгартираётган новатор деб атаса, танқидчилар таъсирнинг ҳаддан ташқари юқори даражада жамлангани ва компанияларни бошқаришнинг мунозарали усулларига эътибор қаратади.

Таҳлилчиларнинг таъкидлашича, “Tesla”нинг муваффақияти жаҳон автомобиль саноатининг электромобилларга ўтишини тезлаштирган асосий омиллардан бирига айланди. Компаниянинг бозор қиймати аллақачон 1 триллион доллардан ошган.

“Reuters” агентлиги сурати