ВАШИНГТОН-ТЕҲРОН, 13 июль. /“Дунё” АА/. Президент Дональд Трампнинг АҚШ ва Эрон музокараларни давом эттириши ҳақидаги баёнотларига қарамай, томонлар ўзаро зарбалар алмашишни давом эттирмоқда, деб хабар бермоқда “Дунё” АА мухбири “Reuters” агентлигига таяниб.

АҚШ Қуролли кучлари Марказий қўмондонлиги (CENTCOM) 12 июль куни кечқурун Эронга қарши янги зарбалар сериясини бошлаганини маълум қилди. Америка томонининг маълумотларига кўра, операциядан кўзланган мақсад Теҳроннинг Ҳўрмуз бўғозидаги фуқаролик кемалари ва тижорий кема қатновига ҳужум қилиш имкониятларини янада пасайтириш бўлган.

Кейинроқ, CENTCOM ўнлаб ҳарбий объектлар, жумладан, ҳаво ҳужумидан мудофаа тизимлари, қирғоқбўйи радиолокация станциялари, ракета ва учувчисиз аппаратлар мажмуалари нишонга олинганини билдирди. Қўмондонлик Эроннинг бўғозни ёпиш ҳақидаги баёнотларига қарамай, Америка кучлари кема қатнови эркинлигини таъминлашга тайёрлигини билдирди.

Эрон давлат ОАВлари Сирик, Бандар-Аббос, Жаск туманлари ва Қешм оролида портлашлар содир бўлгани ҳақида хабар берди. “IRNA” ахборот агентлигининг хабарига кўра, АҚШ зарбалари оқибатида бир киши ҳалок бўлган, яна бир неча киши яраланган.

АҚШнинг янги зарбаларидан сўнг Ислом инқилоби посбонлари корпуси Қувайт, Баҳрайн ва Иорданиядаги Америка ҳарбий объектларига зарбалар берилганини эълон қилди. Аввалроқ, Эрон Қатар, Уммон ва БААдаги АҚШ объектларига ҳам ҳужум қилган эди.

Иордания ҳарбийлари Эроннинг бир нечта ракетасини уриб туширганини маълум қилди. Қувайт ўз қуролли кучлари ҳаво таҳдидларини қайтарганини, Баҳрайн ҳаво нишонлари тутиб олинганини, БАА эса ракета ва дронлар ҳужуми қайтарилганини хабар қилди.

Бу кескинлашув АҚШ аввалроқ Эроннинг 140 га яқин ҳарбий объектига ҳужум қилганидан кейинги ўзаро зарбалар алмашинувининг давоми бўлди. CENTCOM маълумотларига кўра, сўнгги бир неча кун ичида Америка кучлари Эрондаги 300 дан ортиқ ҳарбий нишонга зарба берган.

Жанговар ҳаракатларнинг янги тўлқини Вашингтон ва Теҳрон ўртасида июнь ойида имзоланган вақтинчалик келишувнинг амал қилишини хавф остига қўйди. Ҳужжатда жанговар ҳаракатларни тўхтатиш, Ҳўрмуз бўғози орқали кема қатновини тиклаш ва кейинги музокараларни ўтказиш кўзда тутилган эди.

Ўтган ҳафта Дональд Трамп сулҳ амалда бекор қилинган деб ҳисоблашини, бироқ музокаралар давом этишини қайд этганди. Кеча у сўнгги зарбаларни шарҳлар экан: “Биз уларга жиддий зарба беряпмиз”, – деди.

Эрон, ўз навбатида, АҚШни дипломатик саъй-ҳаракатларни барбод қилганликда айблади. Мамлакат Ташқи ишлар вазирлигининг баёнотига кўра, АҚШнинг сўнгги ҳужумлари минтақада кескинликни пасайтириш ва тинчликка эришиш йўлидаги кўп ойлик уринишларни пучга чиқарган.

Шунингдек, Теҳроннинг маълум қилишича, Уммон билан Ҳўрмуз бўғозини бошқариш масалалари бўйича маслаҳатлашувлар самарасиз якунланган. Эроннинг даъво қилишича, бунга АҚШ томонидан бўлган босим сабаб бўлган.

Айни вақтда томонлар Ҳўрмуз бўғозидаги вазият юзасидан бир-бирига зид баёнотлар беришда давом этмоқда. Эрон бўғоз кейинги хабарномага қадар ёпиқлигича қолишини даъво қилаётган бир пайтда, АҚШ кемалар ҳаракати давом этаётганини ва Америка кучлари навигация эркинлигини таъминлаётганини билдирган.