ВАШИНГТОН–БАҒДОД, 15 июль. /“Дунё” АА/. АҚШ президенти Дональд Трамп Оқ уйда мамлакатнинг янги бош вазири Али аз-Зайдий билан бўлиб ўтган илк учрашув чоғида Америка қўшинлари 30 сентябргача Ироқни тўлиқ тарк этишини маълум қилди, дея хабар бермоқда “Дунё” АА мухбири “AP” агентлиги маълумотига таяниб.

“Улар бизга ортиқ керак эмас”, – деди Дональд Трамп Америка ҳарбий контингентининг олиб чиқилишига изоҳ берар экан. Кейинроқ Пентагон қўшинларнинг олиб чиқилиши “Ислом давлати” террорчилик гуруҳига қарши Америка миссиясини тугатиш тўғрисида 2024 йилда тузилган келишувга мувофиқ якунланишини маълум қилди. Америка қўшинлари чиқиб кетгач, хавфсизликни таъминлаш масъулияти тўлиқ АҚШ томонидан тайёрланган Ироқ кучлари зиммасига юкланади.

Овал офисдаги учрашув чоғида АҚШ президенти янги бош вазирга юксак баҳо бериб, уни минтақанинг бўлажак нуфузли етакчиси деб атади.

“Бу сўзларимни эслаб қолинг. Мен нима қилаётганимни билардим. Бу киши Яқин Шарқда, Ироқдан ҳам ташқарида буюк етакчига айланади. Унинг таъсири бутун минтақага ёйилади”, – дея таъкидлади у.

Али аз-Зайдий таржимон орқали сўзга чиқиб, дунёнинг энг қадимий цивилизациясидан салом йўллади ва ташрифининг асосий мақсади Ироқ ҳамда АҚШ ўртасидаги иқтисодий шерикликнинг янги босқичини эълон қилиш эканини билдирди.

Ироқ расмийларининг сўзларига кўра, яқин кунларда Ироқ, Американинг “Chevron” ва “TI Capital” компаниялари ҳамда Қатарнинг “UCC” ширкати ўртасида Басрадан Ҳадита орқали Туркиянинг Жайҳон ва Суриянинг Баниёс портларига нефть қувурини қуриш бўйича келишув имзоланиши мумкин. Қувурнинг лойиҳавий қуввати суткасига қарийб 2 миллион баррель нефтни ташкил этади.

Музокараларнинг асосий мавзуларидан бири Эроннинг Ироқдаги таъсири бўлди. Вашингтон Бағдоддан мамлакатда фаолият юритаётган эронпараст қуролли гуруҳларни қуролсизлантиришни талаб қилмоқда. Ушбу гуруҳларнинг бир қисми Эрон­–Исроил уруши бошланганидан сўнг Американинг ҳарбий базалари ва дипломатик объектларига зарбалар берган эди.

Бош вазир 30 сентябрдан кейин бу гуруҳларнинг мавжуд бўлиши учун ҳеч қандай асос қолмаслигини маълум қилди. АҚШ маъмурияти вакилининг айтишича, Вашингтоннинг Бағдодга нисбатан кейинги қарорлари Ироқ ўз мажбуриятларини қай даражада муваффақиятли бажаришига боғлиқ бўлади.

Аввалроқ Дональд Трамп Ироқдаги кўп ойлик сиёсий инқироздан сўнг Али аз-Зайдининг бош вазирлик лавозимига номзодини шахсан қўллаб-қувватлаган эди. У Вашингтонда Теҳрон билан ўта яқин алоқадор деб ҳисобланадиган собиқ бош вазир Нури ал-Маликий ҳокимиятга қайтган тақдирда, АҚШ мамлакатни қўллаб-қувватлашни тўхтатиши мумкинлиги ҳақида огоҳлантирган.