ВАШИНГТОН, 24 июнь. /“Дунё” АА/. АҚШ ҳукумати Жаҳон чемпионати вақтида Эрон миллий терма жамоасининг ҳаракатланишига оид чекловларни юмшатиб, жамоага ўйин ўтказиладиган шаҳарларга учрашувдан икки кун олдин келишга рухсат берди, деб хабар қилмоқда “Дунё” АА мухбири “Axios” нашрига таяниб.

Янги қоидаларга кўра, Эрон терма жамоаси 27 июнь куни Тошкент вақти билан соат 8:00да Мисрга қарши бўлиб ўтадиган ўйиндан икки кун аввал Сиэтлга йўл олиши мумкин. Шу билан бирга, учрашув якунлангач, терма жамоа АҚШ ҳудудини тарк этиб, Мексиканинг Тихуана шаҳридаги ўз қароргоҳига қайтиши шарт.

Оқ уйнинг ФИФА масалалари бўйича ишчи гуруҳи ижрочи директори Эндрю Жулианининг маълум қилишича, бу қарор олдиндан режалаштирилган. Унинг сўзларига кўра, Америка томони жамоанинг дастлабки иккита сафарини кузатиб, муаммолар кузатилмаса, узоқ масофали парвозларни инобатга олган ҳолда, иқлимга мослашиш учун қўшимча вақт тақдим этишни ният қилган.

Эрон футбол федерацияси жамоанинг 24 июнь куни Тихуанадаги қароргоҳини тарк этиб, Сиэтлга йўл олишини тасдиқлади. 25 июнь куни терма жамоа Вашингтон университети ҳудудида машғулот ўтказади.

Аввалроқ Эрон томони ҳаракатланишдаги чекловлардан бир неча бор норозилик билдирган эди. Жамоа сардори Алиризо Жаҳонбахшнинг айтишича, Эрон терма жамоаси чемпионатдаги барча жамоалар учун тенг шароитлар бўлишига умид қилмоқда. Ўйинчилар ва делегация вакиллари, шунингдек, Мексика ва АҚШ ўртасидаги чегарани кесиб ўтишда қийинчиликлар юзага келаётганини маълум қилган.

Америка расмийларининг Ислом инқилоби посбонлари корпуси билан алоқадор экани тахмин қилинган шахснинг АҚШга киришга урингани ҳақидаги баёнотлари вазиятни янада кескинлаштирди. Эрон футбол федерацияси бу айбловларни ёлғон деб атаб, қатъиян рад этди.

Шу билан бирга, АҚШ Сенати Эронга қарши ҳарбий ҳаракатларни тўхтатиш тўғрисидаги резолюцияни қўллаб-қувватлади. Ҳужжат аввалроқ Вакиллар палатаси томонидан қабул қилинганидан сўнг, 48 нафар сенатор қарши, 50 нафари эса ёқлаб овоз бериши билан маъқулланди.

Резолюция Америка қуролли кучларини Эрон билан ёки унга қарши ҳарбий ҳаракатлар ҳудудидан олиб чиқиб кетишни кўзда тутади. Таъкидланишича, овоз бериш жараёни республикачиларнинг бир қисми ўртасида 2026 йил февраль ойи охиридан бери давом этаётган АҚШ, Исроил ва Эрон ўртасидаги можародан хавотир кучайиб бораётганини кўрсатган.

Шу билан бирга, ҳужжат асосан рамзий аҳамиятга эга. Гарчи АҚШ президенти Дональд Трамп унга вето қўя олмаса-да, резолюция мажбурий юридик кучга эга эмас. Ҳужжат ташаббускорлари бўлган демократ-сенаторларнинг баёнот беришича, Конгресс ўз розилигисиз ҳарбий ҳаракатларни қайта бошлашга йўл қўйиб бўлмаслиги ҳақидаги ўз позициясини аниқ билдириши лозим.

“Reuters” агентлиги сурати