ТОШКЕНТ, 23 ноябрь. /«Дунё» АА/. Франция пойтахтида ўтаётган ЮНЕСКО Бош ассамблеясининг 42-сессиясида Ўзбекистоннинг навбатдаги, 43-сессияни 2025 йилда Самарқандда ўтказиш тўғрисидаги таклифи қўллаб-қувватланди ва тегишли қарор қабул қилинди, деб хабар бермоқда «Дунё» АА мухбири.

«Қирқ йилдан ортиқ вақт давомида илк бор ЮНЕСКО Бош ассамблеясининг сессияси Париж шаҳридан ташқарида ўтказиладиган бўлди, - деб ёзди давлатимиз раҳбари матбуот котиби Шерзод Асадов ўзининг telegram каналида. - Франция пойтахтида ўтаётган ЮНЕСКО Бош ассамблеясининг 42-сессиясида Ўзбекистоннинг навбатдаги, 43-сессияни 2025 йилда Самарқандда ўтказиш тўғрисидаги таклифи қўллаб-қувватланди ва тегишли қарор қабул қилинди.

«Бу дипломатик муваффақият», - дея изоҳлади қабул қилинган қарорни 42-сессия раиси Симона-Мирела Микулеску».

Эслатиб ўтамиз, 16-20 октябрь кунлари Самарқанд шаҳрида Бутунжаҳон сайёҳлик ташкилоти (ЮНВТО) Бош ассамблеясининг 25-сессияси муваффақиятли бўлиб ўтди. Унда 140 дан ортиқ давлат вакиллари иштирок этди. Сессиянинг очилиш маросимида Ўзбекистон Президенти Шавкат Мирзиёев маъруза қилди.