ЖЕНЕВА, 11 май. /“Дунё” АА/. Жаҳон соғлиқни сақлаш ташкилоти (ЖССТ) хантавирус билан боғлиқ инфекция тарқалиши муносабати билан зарарланганлар билан алоқада бўлган “MV Hondius” круиз кемаси йўловчиларига 42 кунгача карантин сақлашни тавсия қилди, деб хабар қилмоқда “Дунё” АА мухбири.

ЖССТ маълумотига кўра, карантин махсус тиббий муассасаларда ҳам, уй шароитида ҳам ўтказилиши мумкин. Ташкилот қайд этишича, у ягона чеклов формасини белгиламайди, балки мамлакатларга эпидемиологик вазиятдан келиб чиққан ҳолда тавсиялар беради.

Круиз кемасидаги ҳолат

Аргентинадан Кабо-Вердега йўл олган, бортида 23 мамлакатдан 150 нафардан ортиқ йўловчи бўлган “MV Hondius” кемасида бир нечта хантавирус ҳолатлари аниқлангандан сўнг инфекция ўчоғи пайдо бўлган. Жами етти нафар касалланиш қайд этилган, улардан уч нафари вафот этган.

Испания ҳукумати Канар ороллари яқинида турган кема йўловчиларини эвакуация қилишни бошлаган. 90 дан ортиқ киши махсус рейслар орқали Испания, Франция, Буюк Британия, АҚШ, Нидерландия ва бошқа давлатларга олиб кетилган.

Йўловчилар карантин муассасаларига жойлаштирилган ёки тиббий кузатув остида изоляция қилинган. Испанияда уларнинг бир қисми Мадриддаги ҳарбий госпиталга жойлаштирилган, бошқа мамлакатларда ҳам шунга ўхшаш чоралар кўрилган.

Эвакуация жараёнида биологик хавфсизлик протоколлари ва ҳимоя воситалари фаол қўлланилгани маълум қилинган.

Касаллик ҳолатлари

Инфекция босқичма-босқич аниқланган: илк аломатлар апрель ойи бошидаёқ қайд этилган, аммо вазият ўлим ҳолатлари маълум бўлгач оғирлашган. Биринчи ўлим 11 апрелда, иккинчиси 2 майда қайд этилган, яна бир йўловчи эвакуациядан сўнг Сент-Елена оролида вафот этиб, кейинчалик Жанубий Африкага кўчирилган.

Айрим йўловчиларда симптомлар эвакуация жараёнида ҳам пайдо бўлган. Масалан, Парижга учган чартер рейсида француз фуқаросида аломатлар кузатилган ва у дарҳол изоляция қилинган.

Турли мамлакатлар тиббий хизматлари эвакуация қилинганлар орасида янги гумонли ҳолатлар ҳақида хабар бермоқда. АҚШга юборилган бир йўловчида енгил симптомлар қайд этилган, яна бир кишида вирусга мусбат реакция эҳтимоли билдирилган.

Хантавирус ҳақида

Хантавируслар – кемирувчилар орқали юқадиган вируслар гуруҳи. Инсон одатда зарарланган ҳайвонлар ёки уларнинг чиқиндилари билан контакт орқали юқтиради. Кам ҳолларда инсондан инсонга юқиши мумкин.

Касаллик ўпка ва юракни зарарлаши (Америкада) ёки геморрагик иситма ва буйрак синдроми (Европа ва Осиёда) кўринишида кечиши мумкин. Оғир ҳолатларда ўлим кўрсаткичи 50 фоизгача етиши мумкин.

Вирусга қарши махсус даволаш усули ва вакцина мавжуд эмас, даволаш эса қўллаб-қувватловчи терапияга асосланади.

ЖССТ баёноти

ЖССТ тиббий муассасаларда хавфсизлик чоралари бажарилса, инфекция тарқалиш хавфи паст эканини таъкидлаган. Ташкилот мамлакатларга эпидемиологик назоратни кучайтириш, беморларни изоляция қилиш ва контактларни кузатишни тавсия қилмоқда.

Шунингдек, инсон, ҳайвон ва атроф-муҳит саломатлигини биргаликда кўриб чиқувчи “Ягона соғлиқ” ёндашуви муҳимлиги қайд этилган.

ЖССТ маълумотига кўра, дунё бўйлаб ҳар йили ўн минглаб хантавирус ҳолатлари қайд этилади. Касаллик нисбатан кам учраса-да, айрим шаклларининг юқори ўлим кўрсаткичи сабабли хавфли ҳисобланади.

Ташкилот вазиятни кузатишни давом эттираётгани ва янги ҳолатларни тез аниқлаш ҳамда карантин қоидаларига қатъий риоя қилиш муҳимлигини таъкидлаган.

Жаҳон соғлиқни сақлаш ташкилоти бош директори Тедрос Адҳаном Гебрейесуснинг таъкидлашича, хантавируснинг тарқалиши глобал пандемияга олиб келмайди.

 “Сизлардан мени диққат билан эшитишингизни хоҳлайман: бу яна бир COVID эмас. Ҳозирги пайтда хантавируснинг жамоат саломатлиги учун хавфи пастлигича қолмоқда”, – деди ЖССТ бош директори.

“Reuters” сурати