ЛОНДОН, 12 март. /"Дунё" АА/. Ўзбекистон элчиси Равшан Усманов Британиянинг етакчи инвестициявий холдингларидан бири –"United Green Group" ташкилотининг инвестициялар бўйича бош директори Альбрехт Фришеншлагер билан учрашув ўтказди, деб хабар қилмоқда "Дунё" АА мухбири.

Альбрехт Фришеншлагер Ўзбекистонда амалга оширилаётган кенг кўламли ислоҳотлар, шу жумладан, хорижий инвесторларга яратиб берилаётган қулай иқтисодий имконият ва имтиёзларни юқори баҳолади. Унинг айтишича, "United Green Group" холдинги Ўзбекистон билан инвестициявий ҳамкорлик ўрнатишдан манфаатдор.

Томонлар ҳамкорликнинг аниқ йўналишларини белгилаш учун "United Green Group" ва Ўзбекистоннинг тегишли вазирлик ҳамда идоралари ўртасида ишчи алоқаларни ўрнатиш бўйича келишувга эришдилар.

"United Green Group" ХХ асрнинг бошида Британияда асос солинган. У ҳозирги кунда энергетика, автомобилсозлик, савдо, кўчмас мулк, қишлоқ хўжалиги ва тижорат соҳасида фаолият олиб бормоқда. Холдинг ўзининг бой тажрибаси, инновацион ёндашувлари ва кенг кўламли фаолияти орқали халқаро миқёсда кўплаб лойиҳаларни муваффақиятли амалга оширган.