ТОКИО, 2 ноябрь. /"Дунё" АА/. Япония Халқаро ҳамкорлик банки (JBIC) Ўзбекистонда қуёш энергияси ишлаб чиқариш ва энергияни сақлаш тизимларидан иборат, жами 1000 мегаватт қувватга эга икки йирик иншоот қурилишини молиялаштириш мақсадида 1,45 миллиард долларлик молиялаштириш пакетини шакллантиряпти, деб хабар бермоқда "Дунё" АА мухбири.

Япониянинг "Nikkei Asia" нашри маълумотига кўра, мазкур лойиҳада Саудия Арабистонининг "ACWA Power" компанияси асосий инвестор сифатида 51 фоиз улуш билан иштирок этади. Шунингдек Япониянинг "Sumitomo Corp.", "Chubu Electric Power" ва "Shikoku Electric Power" компаниялари ҳам ҳамкор сифатида жалб этилган.

Молиялаштиришнинг асосий қисми – 635 миллион АҚШ доллар JBIC ҳиссасига тўғри келади. Япониянинг етакчи хусусий молия институтлари – "Sumitomo Mitsui Banking Corp.", "Norinchukin Bank" ҳамда давлат томонидан қўллаб-қувватланувчи "Nippon Export and Investment Insurance" (NEXI) суғурта корпорацияси лойиҳа молиялаштирилишида иштирок этмоқда.

Экспертлар фикрича, Ўзбекистон ҳукумати томонидан 2030 йилгача қайта тикланадиган энергия улушини 10 фоиздан 54 фоизга етказиш режаси япон компаниялари учун янгидан-янги ҳамкорлик имкониятларини очиб бериш имкониятини яратади.