БОҒДОД, 5 сентябрь. /"Дунё" АА/. Ироқнинг "Agnaden" газетасида "Ўзбекистон ва Хитой: глобал ўзгаришлар даврида стратегик ҳамкорлик" сарлавҳали мақола чоп этилди, деб хабар қилмоқда "Дунё" АА мухбири.

"Бугунги кунда Тошкент ва Пекин ўртасидаги муносабат янги Евроосиёнинг асосий таянчларидан бирига айланди. Бу ҳамкорлик бизнинг кун тартибидаги прагматик чекловлар билан маҳдудланмайди – у глобал координаталар тизимида Марказий Осиёнинг келажагини белгилайдиган стратегик векторни ташкил этади", – деб таъкидланган мақолада.

Қайд этилишича, икки томонлама мулоқот халқаро тузилмалар доирасидаги ўзаро ҳамкорлик орқали фаол қўллаб-қувватланмоқда. 2025 йил июнь ойида томонлар БМТ, ШҲТ ва Марказий Осиё-Хитой форматида мувофиқлаштиришни кучайтиришга тайёр эканликларини тасдиқладилар. Ўзбекистон ШҲТга қайта тикланадиган энергия манбаларга сармоя жалб этиш, машинасозликни ривожлантириш ва янги транспорт йўлакларини яратиш учун стратегик платформа сифатида қарайди.

Мақола якунида "Ўзбекистон ва Хитой стратегик шерикчилик бу шунчаки декларацияси эмас, балки аниқ натижалар билан мустаҳкамланган изчил иш эканини намойиш этмоқда. Кўп миллиард долларлик сармоялар, янги транспорт йўлаклари, қўшма яшил энергия лойиҳалари, таълим соҳасидаги ташаббуслар ва маданий алмашинувлар икки томонлама муносабатларни минтақавий барқарорлик пойдеворига айлантирмоқда", – деб ёзилган.