БEРЛИН, 2 июль /"Дунё" АА/. Германиянинг нуфузли "Transfermarket" онлайн-платформасида футбол бўйича Ўзбекистон миллий терма жамоаси бош мураббийи ёрдамчиси Алеш Чех ва Ўзбекистон футбол ассоциацияси (ЎФА) техник директори Ги Киала билан интервью эълон қилинди, деб хабар қилмоқда "Дунё" АА мухбири.

Суҳбатда Ўзбекистоннинг 2026 йилда бўлиб ўтадиган футбол бўйича Жаҳон чемпионатида иштирок этиши ва яқин келажакдаги режалар ҳақида сўз юритилган.

"Жаҳон чемпионатига чиққан кунимиздаги қувончни сўз билан ифодалаш қийин, – дейди Алеш Чех. – Биз 2023 ва 2024 йилларда саралаш ўйинларида мағлубият аламини тотиб кўрган эдик. Аммо бу сафар Жаҳон чемпионатида ўз ўринимизни муносиб эгалладик. Биз 20-25 нафар футболчи билан ишлаймиз. Уларни ягона жамоага айлантириш, аввало, сабр-тоқат, ишонч ва ҳалолликни талаб қилади. Дастлаб биз уларга жамоавий ҳимоя ва жамоавий ҳужумда ўйнашнинг нима учун муҳимлигини тушунтиришга вақт ажратдик. Биз тинимсиз ишладик ва энди якуний натижани кўряпсиз".

Мураббий ёрдамчиси, шунингдек, барча саралаш ўйинлари давомида ҳеч қачон жамоа кучига шубҳа қилмаганини ва мақсадига эришишга доимо ишонганини билдирган. "Йил бошида бош мураббий Сречко Катанецнинг касаллиги туфайли истеъфога чиқиши жамоани янада бирлаштирди. Унинг кетиши барчамиз учун қайғули бўлди, аммо биз унинг орзусини рўёбга чиқаришни янада кўпроқ истадик. Келгуси йилда биз океан ортига борамиз. Бу аввало Сречко туфайли, у Ўзбекистон футболи учун катта иш қилди", – деган Словениялик мутахассис. 

Ўзбекистон миллий терма жамоаси бош мураббийи ёрдамчиси таъкидига кўра, Элдор Шомуродов ва Абдуқодир Ҳусанов каби ўзбек футболчиларининг етакчи Европанинг машҳур клубларда ўйнаётганлиги Ўзбекистон жаҳон аренасига чиққанлигидан далолат беради. "Бугун ўзбекистонлик ёшлар Месси, Роналду ёки Мбаппенинг эмас, Шомуродов ва Ҳусановнинг футболкаларини киймоқда. Уларнинг иккаласи ҳам жуда камтарин йигитлар. Ёш авлод улар тимсолида ўзбек футболи фақатгина қаттиқ меҳнат ва интизом туфайли Европадан устун келиши мумкинлигини кўриши керак", – дея таъкидланган Алеш Чех.

Мураббий ёрдамчиси интервью охирида "Ҳар бир футболчи учун жаҳон чемпионатининг финал босқичида ўйнаш имконияти унинг фаолиятидаги энг ёрқин воқеадир. Биз Шимолий Америкага шунчаки эмас, балки катта мақсад билан боряпмиз. Биз жамоамизнинг дастлабки босқичдан ўтишини, ҳатто Германия каби жамоаларни ва Аргентина ёки Бразилия каби потенциал рақибларни мағлуб этишни ва Ўзбекистон турнирда муносиб иштирок этишини истаймиз", – дея фикр билдирган.

ЎФА техник директори Ги Киалани немис мухбири билан суҳбатда сўнгги йилларда Ўзбекистонда футболни ривожлантириш бўйича йирик лойиҳалар амалга оширилаётгани ва ҳукумат инфратузилмани яхшилашга катта миқдорда сармоя киритаётганини алоҳида таъкидлаган. Унинг айтишича, ушбу амалга оширилаётган ишлар аллақачон ўз мевасини бера бошлаган.

"Сўнгги йилларда биз ёшларни ривожлантириш бўйича катта ишларни бошладик. Мамлакат ҳукумати футбол инфратузилмасига катта сармоя киритган. Айни пайтда халқаро мусобақаларга тайёргарлик кўриш учун жаҳон андозалари даражасидаги майдонлар ва болалар учун замонавий футбол академиялари қад ростлаган. Бу чора-тадбирлар ўз самарасини бераётгани ўтган йили миллий терма жамоамиз футбол бўйича Олимпия ўйинларида илк бор иштирок этганида яққол намоён бўлди. Жорий йил U-17 Осиё кубогини қўлга киритгани эса сўзимнинг яна бир карра исботидир.", – дея қайд этади Ги Киала.

 Интервьюда илгари Ўзбекистонда дзюдо ва бокс энг машҳур спорт турлари бўлгани, аммо футболдаги муваффақиятлар бу теоремани бутунлай ўзгартираётгани алоҳида урғуланган.