БЕРЛИН, 3 май. /"Дунё" АА/. "Wirtschaft regional" журналида  Ўзбекистон транспорт-логистика соҳасига бағишланган мақола босилди, деб хабар бермоқда "Дунё" АА мухбири.

Унда Европанинг етакчи трейлер ишлаб чиқарувчиси – "Schmitz Cargobull" Ўзбекистонда янги "Schmitz Cargobull SCA" шуъба компаниясини очиш орқали халқаро миқёсда иштирокини кенгайтиришда давом этаётгани таъкидланган. "Хусусан, Чирчиқ шаҳрида жойлашган янги офис компаниянинг мижозларга хизмат кўрсатиш ва минтақадаги логистика имкониятларини кенгайтириш йўлида муҳим қадам бўлди", – деб ёзилган нашрда.

Қайд этилишича, шу йил апрель ойида "Технодом" ваколатли хизмат кўрсатиш биносида компаниянинг тантанали очилиш маросими бўлиб ўтди. Тадбирда иштирок этган бошқа транспорт компаниялари ва матбуот вакиллари "Schmitz Cargobull" филиалининг инфратузилмаси ва истиқболдаги режалари билан яқиндан танишиш имкониятига эга бўлдилар.

Мақолада филиал мижозларга тиркамалар, қурилиш ва қишлоқ хўжалиги учун совутгичлар сотиш, шунингдек, молиялаштириш, телематика, сервис шартномалари ҳамда асл эҳтиёт қисмларни етказиб бериш каби кенг кўламли хизматларни таклиф этаётгани урғуланган.

Немис нашри, шунингдек, мамлакат бўйлаб эҳтиёт қисмларни хавфсиз ва тезкор етказиб беришни таъминлаш мақсадида филиал ҳудудининг тахминан 300 квадрат метр майдонида ихтисослаштирилган эҳтиёт қисмлар омбори қурилганини маълум қилган.

Қайд этилишича, Ўзбекистонда компания филиалининг очилиши, унинг Марказий Осиёда ўз ўрнини янада мустаҳкамлаш стратегиясининг мантиқий давомидир.

"2024 йилда Ўзбекистонда юк ташиш ҳажми 1,52 миллиард тоннага етди, бу кўрсаткич 2020 йилга нисбатан 11 фоиз ошган. Автомобиль транспорти логистика тизимининг асоси бўлиб қолмоқда ва юк ташиш умумий ҳажмининг 92 фоизини ташкил этади. 2024 йилда автотранспорт компаниялари 1,4 миллиард тонна юк ташиган", – деб ёзган "Wirtschaft regional" журнали Ўзбекистон Миллий статистика қўмитаси маълумотига таяниб.