СИНГАПУР, 14 июнь. /"Дунё" АА/. Сингапурнинг "SunMedia" ахборот агентлиги "Жаҳон инвесторлари Тошкентда тўпланмоқда: Ўзбекистонда тарихий инвестиция форуми ўтказилмоқда" сарлавҳали мақолани эълон қилди, деб хабар қилмоқда "Дунё" АА мухбири.

Нашр аввалида Ўзбекистон пойтахтида етакчи халқаро инвесторлар, ҳукуматлар, молия институтлари ва бизнес вакилларини бирлаштирган минтақавий сармоявий кун тартибидаги муҳим воқеа – IV Тошкент халқаро инвестиция форуми бўлиб ўтгани  маълум қилинган.

"2025 йилги форум мисли кўрилмаган кенг кўламли форматда ўтказилмоқда: бу йилги тадбирда 100 га яқин давлатдан 3000 нафарга яқин хорижлик меҳмонларни ўз ичига олган ҳолда жами 8000 дан ортиқ иштирокчилар қатнашмоқда. Форум минтақавий иқтисодий кун тартибида муҳим воқеага айланди", – дейилади материалда.

Анжуманнинг расмий очилиш маросимида ҳукумат, молия ва саноат соҳаларидаги етакчи вакиллар янги имконият ва ҳамкорлик йўналишларини муҳокама қилиш учун йиғилган. Форумда Болгария Президенти Румен Радев, Словакия Бош вазири Роберт Фицо, Қозоғистон Бош вазири Олжас Бектенов, Марказий Осиё давлатлари юқори даражали расмийлари ҳамда Европа тикланиш ва тараққиёт банки президенти Одиль Рено-Бассо ва Янги тараққиёт банки президенти Дилма Русеф иштирок этди.

Қайд этилишича, форум бир неча кун давом этади ва панель муҳокамалари, икки томонлама учрашувлар, лойиҳалар тақдимотлари ҳамда халқаро ҳамкорликни ривожлантиришга қаратилган шартномалар имзоланишини ўз ичига олади. Шунингдек, форум доирасида илк бор Ўзбекистон миллий саноат ва инвестиция салоҳияти кўргазмаси ташкил этилди. Унда нефт-кимё, машинасозлик, қурилиш, озиқ-овқат маҳсулотларини қайта ишлаш каби соҳалардаги 90 та маҳаллий компания инвестиция учун тайёр лойиҳаларини намойиш этмоқда.

"ACWA Power, Uzum, Koc Construction ва Yandex Uzbekistan каби йирик компанияларнинг ҳомий сифатида иштирок этиши ҳамда банк, энергетика ва технология соҳаларидаги олтин ва кумуш тоифасидаги ҳомийлар форумнинг Ўзбекистон бизнес муҳитига бўлган ишончни янада тасдиқламоқда", – деб таъкидланган манбада.

Маълум қилинишича, форум 100 дан ортиқ журналист ва халқаро медиа вакиллари томонидан ёритилмоқда. Улар орасида CNN, The Guardian ва Al Jazeera каби етакчи ОАВ вакиллари бор.