ВАРШАВА, 14 июнь. /"Дунё" АА/. Польшанинг оммабоп "www.tradersunion.com/pl" электрон порталида "Януш Пехочиньский: Ўзбекистон янги стратегик савдо йўлини очмоқда" сарлавҳали мақола эълон қилинди, деб хабар қилмоқда "Дунё" АА мухбири.

Мақола аввалида Ўзбекистон ўзининг савдо имкониятларини кенгайтириш мақсадида Қирғизистон ва Хитой орқали ўтувчи Мўғулистонга янги савдо йўлини очаётгани таъкидланган.

"Польша-Осиё" Савдо-саноат палатаси президенти Януш Пехочиньскийнинг айтишича, ушбу янги транспорт йўлаги савдо ҳажмини ошириш ва етказиб бериш муддатларини қисқартиришга қаратилган", – дейилади материалда.

Қайд этилишича, ривожланаётган халқаро рақобат шароитида мамлакатлар савдо инфратузилмасини яхшилашнинг самарали усулларини изламоқда, бу эса уларга иқтисодий иштирокини ошириш имконини беради.

"Транспорт ва логистика бўйича эксперт Адам Ковальскийга кўра, янги савдо йўллари минтақада иқтисодий ўсишни тезлаштириши мумкин. Логистика қўшни давлатлар ўртасидаги савдо алоқаларини мустаҳкамлашнинг асосий элементидир", – деб таъкидлаган мақолада.

Шунингдек, муаллиф Марказий Осиёда янги савдо йўлларининг ривожланиши минтақадаги иқтисодий ўзгаришларнинг кенг кўламли суратининг бир қисми бўлиб, бунда мамлакатлар жаҳон бозорларига интеграциялашишга ва илғор иқтисодий мезонларга жавоб беришга интилаётганини урғулаган.