ИСЛОМОБОД, 15 июнь. /"Дунё" АА/. Ўзбекистон Президенти Шавкат Мирзиёевнинг бугун бўлиб ўтган тўртинчи Тошкент халқаро инвестиция форумининг ялпи мажлисида сўзлаган нутқи Покистон жамоатчилиги ва оммавий ахборот воситаларида катта қизиқиш уйғотди, деб хабар қилмоқда "Дунё" АА мухбири.

Хусусан, Покистоннинг етакчи нашрлари – "Associated Press of Pakistan – APP" марказий ахборот агентлиги, "Pakistan in the World", "Daily Ittehad", "Daily Spokesman" ва "The Frontier Post" газеталари, "Media Today", "The Gulf Observer", "The Europe Today" ва "World News" онлайн-платформаларида давлатимиз раҳбарининг тўртинчи Тошкент халқаро инвестиция форумининг ялпи мажлисидаги нутқи тўлиқ шаклда эълон қилинди.

Покистон ОАВ ёзганидек, давлатимиз раҳбари форумдаги нутқини дунёдаги бугунги вазиятнинг қисқача таҳлилидан бошлади. Бугунги кунда геосиёсий жараёнлар шиддат билан ўзгариб, глобал хавфсизлик ва барқарор тараққиётга таҳдидлар кучайиб бораётгани таъкидланди.

Иқтисодий инқирознинг кескинлашуви ва молиявий ресурслар тақчиллиги натижасида жаҳон ялпи ички маҳсулотининг ўсиш суръатлари кетма-кет учинчи йил пасаймоқда.

Ўзбекистон раҳбари минтақавий можаролар ва муаммоларни фақат дипломатик воситалар билан, халқаро ҳуқуқ нормалари ва принциплари асосида, БМТ резолюцияларига мувофиқ ҳал этиш муҳимлигини таъкидлади.

– Мен ҳозир таъкидлаб ўтган муаммолар бўйича барча шерик давлатларимизни очиқ ва кенг кўламли халқаро ҳамкорликка чақирамиз. Чунки форумнинг асосий мавзуси бўлган инвестициялар – фақат иқтисодий тараққиётнинг эмас, балки тинчлик ва барқарорликнинг кафолатидир, - деди давлатимиз раҳбари.

Ўзбекистон етакчиси нафақат даромад келтирадиган, балки инсон қадрини улуғлаш, унинг ҳаётий манфаатлари ва жамият тараққиётини таъминлаш учун мустаҳкам пойдевор бўлиб хизмат қиладиган инвестиция муҳитини яратишга чақирди.

Мамлакат иқтисодий тараққиётини таъминлаш борасидаги ютуқларига алоҳида тўхталиб ўтилди. Сўнгги 8 йилда Ўзбекистон ялпи ички маҳсулоти икки баробар кўпайди. Бу кўрсаткични 2030 йилга бориб 200 миллиард долларга етказиш мақсад қилинган. 2024 йилда инвестициялар ҳажми 35 миллиард долларга, экспорт эса 27 миллиард долларга етган.

Сўнгги 5 йил ичида Ўзбекистон Иқтисодий эркинлик индексида 48 поғонага, Гарварднинг Иқтисодиёт мураккаблиги индексида 28 поғонага кўтарилди.

Ўтган ойда нуфузли "S&P" агентлиги Ўзбекистоннинг суверен рейтинги бўйича прогнозини "барқарор"дан "ижобий"га кўтарди.

"Бугун жаҳон иқтисодиёти янги ўзгаришлар остонасида турганини таъкидлар экан, Ўзбекистон Президенти тўртта муҳим йўналиш бўйича ҳамкорлик қилиш муҳимлигини кўрсатиб ўтди", – дейилади нашрларда.