АШХОБОД, 22 октябрь. /"Дунё" АА/. Кеча Давлетмаммет Азадий номидаги Туркман миллий жаҳон тиллари институтида 21 октябрь – Ўзбек тили байрами кунига бағишланган тантанали тадбир ўтказилди, деб хабар қилмоқда "Дунё" АА мухбири.

Ўзбекистон элчихонаси билан ҳамкорликда ташкил этилган тадбирда институт профессор-ўқитувчилари ва талабалари, Қозоғистон, Қирғизистон, Тожикистон, Озарбайжон ва Туркия элчилари, кенг жамоатчилик ва оммавий ахборот воситалари вакиллари иштирок этди.

Очилиш маросимида Давлетмаммет Азадий номидаги Туркман миллий жаҳон тиллари институти ректори Максат Чариев ва Ўзбекистон элчиси Равшанбек Алимов сўзга чиқиб, она тилининг инсон камоли, маънавияти ва миллий ўзликни англашидаги беқиёс ўрнига, она тилини асраш ва ривожлантириш миллатнинг юксалиши билан узвий боғлиқлигига эътибор қаратдилар.

Ўзбек тилининг кўп асрлик тарихи, унинг бой адабий мероси, замонавий ўзбек тили эса шу тарихий илдизлар асосида ривожланиб, бугунги кунда мустақил Ўзбекистон тараққиётининг жонли ифодасига айланганлиги таъкидланди.

1989 йил 21 октябрда "Давлат тили тўғрисидаги"ги қонуннинг қабул қилиниши, 2020 йилдан буён эса Ўзбек тили байрами куни кенг нишонланиши ўзбек тилининг мақомини янада юксалтиришга хизмат қилаётгани қайд этилди.

Ўзбек ва туркман тилларининг яқинлиги, уларнинг умумий илдизи ва тарихий ришталар ҳақида айтиб ўтилди. Ўзбекистон ва Туркманистон давлат раҳбарларининг ташаббуслари ва саъй-ҳаракатлари туфайли икки қардош мамлакат ўртасида ўртасидаги дўстона муносабатлар ва яқин ҳамкорлик барча соҳаларда изчил ривожланиб бораётгани урғуланди.

Институт талабалари Алишер Навоий, Маҳтумқули Фироғий, Абдулла Орипов, Молланепес, Эркин Воҳидов, Давлетмаммет Азадий, Зулфия каби ўзбек ва туркман шоирларининг шеърларидан ўқиб бердилар. Ижро этилган ўзбек ва туркман ашула ва рақслари тадбирга кўтаринки кайфият бағишлади.

Ўзбекистон элчихонаси номидан тадбирда фаол қатнашган талабаларга эсдалик совғалари, шунингдек, Давлетмаммет Азадий номидаги Туркман миллий жаҳон тиллари институти кутубхонасига ўзбек тилшунослигининг қимматли илмий манбаи бўлган беш жилдлик "Ўзбек тилининг изоҳли луғати" тўплами топширилди.