ТОШКEНТ, 30 сентябрь. /«Дунё» АА/. 1 октябрь - Ўқитувчи ва мураббийлар куни арафасида «Ўзсаноатқурилишбанк» АТБ бош офисида ёшлар билан очиқ мулоқот бўлиб ўтди, деб хабар бермоқда «Дунё» АА мухбири.

Тадбир Президентимиз бошчилигида амалга оширилаётган ёшлар сиёсати ва ислоҳотлар доирасида ташкил этилди.

Давлатимиз раҳбари таъкидлаганидек, ёшлар — халқимизнинг олтин фонди. Улар бандлигини таъминлаш, интилишларига йўл очиш, ўз салоҳиятини тўлиқ намоён этиши учун шароит яратиш — бугунги ислоҳотларимизнинг устувор йўналишидир.

Учрашувда банк раҳбарияти ва Тошкент давлат иқтисодиёт университети вакиллари устозлар тажрибаси ёшлар учун йўл-йўриқ эканини, улардан олинадиган ибрат келажак муваффақиятининг асоси бўлишини қайд этди.

Самимий суҳбат ва савол-жавоб тарзида ўтган тадбир ёш ходимларнинг маънавий-маърифий салоҳиятини юксалтиришга хизмат қилди.