ДАММАМ, 11 февраль. /“Дунё” АА/. Саудия Арабистонининг Аш-Шарқия маъмурий марказидаги олий таълим муассасаларида Алишер Навоий ва Заҳириддин Муҳаммад Бобур ҳаёти ва ижодига бағишланган тақдимот ўтказилди, деб хабар қилмоқда “Дунё” АА мухбири.

Мазкур тадбирлар Саудия Арабистони олий ўқув юртлари ўқитувчиси, Ўзбекистон фуқароси Айтен Алкахтани ташаббуси ва мамлакатимиз элчихонаси кўмагида ташкил этилди.

Иштирокчиларга Алишер Навоийнинг мутафаккир ва жамоат арбоби сифатидаги аҳамияти ҳамда Заҳириддин Муҳаммад Бобурнинг давлат арбоби, саркарда ва шоир сифатидаги ўрни ҳақида атрофлича маълумот берилди. Уларнинг Марказий ва Жанубий Осиёда адабиёт, маданият ва гуманистик қадриятлар ривожига қўшган ҳиссасига алоҳида эътибор қаратилди.

Тақдимотлар доирасида талабалар юртимизнинг тарихий ва маданий мероси, шунингдек, унинг буюк намояндаларининг жаҳон тараққиётидаги ўрнини чуқурроқ англаш имкониятига эга бўлдилар.