МАДРИД, 11 октябрь. /"Дунё" АА/. Панъевропа иттифоқи президенти Карлос Уриарте Санчес (Испания) "Дунё" АА учун интервьюсида Ўзбекистон Президенти Шавкат Мирзиёевнинг 9-10 октябрь кунлари Душанбеда ўтган "Марказий Осиё – Россия" форматидаги иккинчи саммит ва МДҲ Давлат раҳбарлари кенгашининг навбатдаги йиғилишидаги иштироки ҳақидаги фикрларини билдирди:

– Ўзбекистон Президенти Шавкат Мирзиёевнинг маърузаси унинг стратегик дунёқараши, узоқни кўра билиши, минтақада ва жаҳон миқёсида кечаётган жараёнларни чуқур англаганини яна бир бор намоён қилди.

Давлатимиз раҳбарининг Марказий Осиё мамлакатлари ва Россия ўртасидаги шериклик муносабатларини мустаҳкамлашга қаратилган ташаббуси ўзаро ҳурмат, тенг ҳуқуқлилик, барча томонлар учун амалий манфаатлар тамойилларига асосланган халқаро муносабатларни ривожлантиришга замонавий ёндашувни ўзида акс эттиргани алоҳида эътиборга молик.

Президент Шавкат Мирзиёев минтақада тизимли сиёсий мулоқот ва иқтисодий ҳамкорликни чуқурлаштириш муҳимлигини изчил таъкидлаб келади. Унинг Мувофиқлаштирувчи кенгаш таъсис этиш, Саноат инжиниринг хабини ташкил этиш, Атом энергетикаси бўйича Минтақавий компетенциялар марказини тузиш, "Марказий Осиё – Россия энергетик шериклиги" дастурини марказини ташкил этиш бўйича таклифлари узоқ муддатли барқарор ривожланишга қаратилган аниқ ва пухта ўйланган чора-тадбирлардир.

Давлатимиз раҳбарининг инновациялар, таълим, инсон капиталига қаратилаётган алоҳида эътибори юксак таҳсинга сазовор. "Келажак муҳандислари" илмий-таълим консорциуми ва ёш тадқиқотчилар учун грант дастурини ташкил этиш ғояси минтақадаги ёшлар ва илм-фан учун янги уфқларни очмоқда. Булар шунчаки ташаббуслар эмас, балки Марказий Осиёнинг интеллектуал ва технологик салоҳиятини шакллантирадиган келажакка стратегик сармоядир.

Президент Шавкат Мирзиёев минтақавий ҳамкорликни нафақат иқтисодий мақсадга мувофиқ, балки ишонч, маданий ўзаро тушуниш ва хавфсизликни мустаҳкамлаш йўли сифатида кўриб, прагматизм ва инсонпарварликнинг ўзига хос синтезини намойиш қилаётганини алоҳида таъкидлаш муҳимдир.

Умуман олганда, Президент Шавкат Мирзиёевнинг интеграция, инновациялар ва барқарор ривожланишга қаратилган изчил сиёсатидан чин дилдан ҳайратда эканлигимни билдирмоқчиман. Унинг нутқи шунчаки сиёсий ҳужжат эмас, балки Марказий Осиё ва Россия ўртасидаги ўзаро муносабатларнинг янги даври учун илҳомлантирувчи манифест бўлиб, марказ марказида одамлар, билим ва бунёдкорликдир.