КУАЛА-ЛУМПУР, 21 февраль. /"Дунё" АА/. Ўзбекистон элчихонасида "MMC Corporation" корпорациясининг Стратегия ва инвестиция масалалари бўйича директори Нажиб Рамли билан учрашув бўлиб ўтди, деб хабар қилмоқда "Дунё" АА мухбири.

Нажиб Рамли корпорация бош директори Че Халибнинг шу йил 5 февраль куни Куала-Лумпурда ўтказилган олий даражадаги Ўзбекистон-Малайзия бизнес-форуми якунида давлатимиз раҳбари билан мулоқоти республикада аниқ лойиҳаларни амалга ошириш учун муҳим туртки бўлганлигини маълум қилди.

Жумладан, корпорация республикада Ўзбекистон-Малайзия саноат зонасини ташкил этиш ва бошқаришни режалаштирмоқда.

Малайзия томонига Ўзбекистон-Малайзия саноат зонасини жойлаштириш учун ер майдони ва унинг бирламчи инфратузилма билан таъминланганлик ҳолати тўғрисида тақдимот қилинди.

Шунингдек, мамлакатимиздаги махсус саноат зоналари турлари, уларда инвесторлар учун тақдим этилаётган имтиёзлар тўғрисида батафсил маълумот берилди.

Корпорация вакили Ўзбекистон-Малайзия саноат зонасини ташкил этиш имкониятларини батафсил ўрганиш учун яқин кунларда мутахассислардан иборат ишчи гуруҳни Ўзбекистонга ташриф буюришни маълум қилди.

"MMC Corporation" 1911 йилда ташкил этилган. Бугунги кунида мазкур корпорация портлар ва логистика, энергетика, қурилиш ва муҳандислик, саноат индустриал ривожланиш соҳаларига ихтисослашган бир қанча корхоналарни бирлаштиради.