ДЕҲЛИ, 8 июнь. /“Дунё” АА/. Ўзбекистон Тиббиёт ва фармацевтика тармоғини ривожлантириш агентлиги директори Абдулла Азизов Ҳиндистонга амалга оширган амалий сафари доирасида Телангана штати бош вазири ўринбосари Маллу Бҳатти Викрамарка билан учрашув ўтказди, деб хабар қилмоқда “Дунё” АА мухбири.

Тадбир чоғида томонлар соғлиқни сақлаш, фармацевтика, инвестициялар ва саноатни ривожлантириш соҳаларида ўзаро ҳамкорликни янада мустаҳкамлаш истиқболлари, шунингдек Ўзбекистон ва Телангана штати ўртасидаги ҳамкорликни кенгайтириш истиқболларини муҳокама қилди.

Учрашувда Ўзбекистоннинг Ҳиндистондаги элчиси Сардор Рустамбоев ҳам иштирок этиб, Маллу Бҳатти Викрамаркани V Тошкент халқаро инвестиция форумида иштирок этишга таклиф қилди.

Мулоқот якунида томонлар кўпқиррали шерикликни ривожлантириш ва қўшма ташаббусларни амалга оширишдан манфаатдор эканини тасдиқлади.