ВАШИНГТОН, 8 июнь. /“Дунё” АА/. АҚШ Президенти Дональд Трамп Эрон билан давом этаётган зиддият фонида Исроил Бош вазири Бинямин Нетаняхунинг Вашингтон Теҳрон билан эришадиган ҳар қандай келишувни қабул қилишдан бошқа иложи йўқлигини маълум қилди, деб хабар бермоқда “Дунё” АА мухбири “Financial Times” газетасига берилган интервьюга таяниб.

“Барча қарорларни мен қабул қиламан. У [Бинямин Нетаньяху] қарор қабул қилмайди”, – дея таъкидлади Оқ уй раҳбари Исроил Эрон томонидан ракета зарбаси берилгани ҳақида хабар қилганидан кўп ўтмай чоп этилган интервьюсида.

Ислом инқилоби посбонлари корпуси (ИИПК) Исроилнинг Ливан пойтахтидаги “Ҳизбуллоҳ” объектига берган зарбасига жавобан уюштирилган ҳужумни “огоҳлантириш” деб атади. Оқибатда икки киши ҳалок бўлган, 20 киши яраланган.

АҚШ Президенти Дональд Трамп Теҳроннинг хатти-ҳаракатларидан норозилигини билдирди. “Мен Эронга шундай маслаҳат берган бўлардим: сизлар ракеталарингизни учирдингиз. Шунинг ўзи етарли”, – деди давлат раҳбари “Fox News” телеканалига.

“Биз Эрон билан якуний битимга жуда яқинмиз. Ҳозир содир бўлаётган воқеалар туфайли унинг барбод бўлишини истамайман”, – дея изоҳ берди Дональд Трамп.

“Axios” портали маълумотларига кўра, Оқ уй раҳбари Исроил Бош вазири билан телефон орқали мулоқот қилиб, уни Эронга жавоб зарбаси бермасликка чақирган. Бироқ, бир неча соат ўтгач, Исроил ҳарбий-ҳаво кучлари Ислом Республикасининг зарбаларига жавобан Эроннинг ғарбий ва марказий қисмидаги нишонларга ҳужум қилди. ЦАХАЛ хабарида айнан қайси объектларга зарба берилганига аниқлик киритилмаган.

“Reuters” агентлиги сурати