КАРАЧИ, 6 сентябрь. /“Дунё” АА/. Ўзбекистон элчиси Алишер Тўхтаев Карачи шаҳрида Покистоннинг йирик тўқимачилик компанияларидан бири – “Al Karam” бош директори Асад Фавад билан учрашув ўтказди, деб хабар бермоқда “Дунё” АА мухбири.

Учрашувда Ўзбекистонда ип йигириш, матоларни бўяш ва тайёр кийим-кечак ишлаб чиқариш ҳамда экспортга йўналтирилган қўшма инвестиция лойиҳаларини амалга ошириш масалалари атрофлича муҳокама қилинди.

Асад Фаваднинг таъкидлашича, “Al Karam” компанияси тўқимачилик маҳсулотларини ишлаб чиқариш ва экспорт қилиш бўйича бой тажрибага эга бўлиб, “IKEA”, “Walmart” ва “Target” каби жаҳоннинг етакчи халқаро чакана савдо тармоқлари билан фаол ҳамкорлик қилиб келмоқда.

Суҳбат чоғида “Al Karam Studio” брендини Ўзбекистон бозорига олиб кириш масалаларига алоҳида эътибор қаратилди. Жумладан, Тошкент шаҳрида бренд филиалини ташкил этиш, маҳаллий ҳамкорлар билан франчайзинг асосида ишлаш ва айрим маҳсулот турларини маҳаллийлаштириш таклиф этилди. Қайд этилганидек, ушбу ташаббуслар мамлакатимизда замонавий чакана савдо ва енгил саноат соҳаларида янги лойиҳаларни шакллантиришга хизмат қилади.

Музокаралар якунида амалий ҳамкорликнинг дастлабки йўналишлари белгилаб олинди. Хусусан, тўқимачилик соҳасида қўшма ишлаб чиқариш лойиҳасининг дастлабки техник-иқтисодий кўрсаткичларини ишлаб чиқиш, “Al Karam Studio” брендини Ўзбекистон бозорига олиб кириш учун салоҳиятли маҳаллий ҳамкорларни аниқлаш ҳамда қўшма инвестиция лойиҳасини ташкил этиш имкониятларини ўрганишга келишиб олинди.

Таъкидлаш жоизки, музокаралар чоғида илгари сурилган инвестиция таклифларининг амалга оширилиши Ўзбекистон ва Покистон ўртасидаги иқтисодий шерикликни янги, юқори қўшилган қийматга эга йўналишлар билан бойитишга хизмат қилади.