ЛЕУВАРДЕН, 6 сентябрь. /“Дунё” АА/. Ўзбекистон элчиси Ғайрат Фазилов Нидерландиянинг Фрисланд провинциясига ташриф буюриб, ҳудуд раҳбарияти, компаниялар ҳамда илмий-инновацион марказлар вакиллари билан учрашув ўтказди, деб хабар бермоқда “Дунё” АА мухбири.

Провинциянинг қироллик комиссари Арно Брок билан ўтказилган мулоқотда замонавий Ўзбекистонда сўнгги йилларда амалга оширилаётган кенг қамровли ислоҳотлар, иқтисодиёт, инвестиция, саноат, қишлоқ хўжалиги ҳамда ижтимоий соҳаларда эришилган ижобий натижалар ҳақида маълумот берилди.

Томонлар чорвачилик, сут саноати, сув хўжалиги, аграр таълим, туризм ва кадрлар тайёрлаш соҳаларида ҳамкорликни ривожлантириш истиқболларини муҳокама қилдилар. Шунингдек, Фрисланд ва Ўзбекистон ҳудудларидан бири ўртасида шериклик алоқаларини ўрнатиш таклиф этилди. Арно Брок нафақат идоралараро, балки компаниялар, университетлар, илмий марказлар ва инсонлар ўртасидаги бевосита алоқаларни ривожлантириш муҳимлигини таъкидлади.

Ташриф давомида “Firma Schaap”, “Venema Sugar Installations” ва “OD Security” компаниялари раҳбарияти билан учрашувлар ўтказилди ҳамда “Dairy Campus” илмий-инновацион маркази фаолияти билан танишилди.

Хусусан, “Firma Schaap” компанияси билан Андижон вилоятига 1 минг бошга яқин наслли чорва молларини етказиб бериш, “Venema Sugar Installations” билан Ўзбекистондаги янги шакар ишлаб чиқариш лойиҳасида иштирок этиш ва хомашё сифатини автоматик назорат қилиш тизимларини жорий этиш масалалари кўриб чиқилди. “OD Security” компанияси билан эса рентген сканерларини юртимизнинг божхона, чегара, пенитенциар ва аэропорт инфратузилмасида қўллаш имкониятлари муҳокама қилинди. Ушбу компания Тошкентда ўтказиладиган “InnoWeek-2026” ҳафталигида иштирок этишга қизиқиш билдирди.

Сўнгги русумдаги технологиялар билан жиҳозланган “Dairy Campus” марказида “аклли фермалар”, озуқа самарадорлиги, чиқиндиларни камайтириш, биогаз ва ҳайвонот саломатлиги соҳасидаги тадқиқотлар тажрибаси ўрганилди.

Ташриф якунлари бўйича Ўзбекистон ва Фрисланд ўртасида агросаноат, технологик, илмий ва таълим соҳаларида келгусидаги ҳамкорликнинг аниқ йўналишлари белгилаб олинди.