ИСЛОМОБОД, 5 ноябрь. /“Дунё” АА/. Ўзбекистон элчихонаси кўмагида 2–4 ноябрь кунлари Покистоннинг “Vision Group” компанияси раиси ўринбосари Абдул Реҳман Хан бошчилигидаги делегациянинг Ўзбекистонга сафари ташкил этилди, деб хабар бермоқда “Дунё” АА мухбири.

Бизнес-миссия давомида “Vision Group” компанияси мутасаддилари Ўзбекистон Инвестициялар, саноат ва савдо вазирлиги раҳбарияти билан музокаралар ўтказди.

Унда Давлатимиз Раҳбари ташаббуси билан бунёд этилаётган Янги Тошкент шаҳрида амалга оширилиши мумкин бўлган инвестиция лойиҳаларининг умумий концепцияси, тахминий кўлами, молиялаштириш ҳамда ташкилий-ҳуқуқий механизмлари муҳокама қилинди.

Хусусан, янги шаҳарда талаб юқори бўлиши кутилаётган турар жой, меҳмонхона, офис ва тижорат объектларини барпо этиш, шунингдек, Ўзбекистонда доимий фаолият юритувчи девелоперлик компаниясини ташкил этиш истиқболлари кўриб чиқилди.

Шунингдек, Покистон бизнеси вакиллари Янги Тошкент шаҳрини барпо этиш дирекциясида бўлиб, истиқболли лойиҳалар ва инвесторларга тақдим этилаётган шарт-шароитлар билан танишди.

Янги Тошкент шаҳрини барпо этиш дирекцияси мутасаддилари билан бўлиб ўтган учрашувда делегация вакилларига инвестиция лойиҳаларини жойлаштириш учун мўлжалланган истиқболли ер участкалари ва уларнинг функционал йўналишлари юзасидан атрофлича маълумот берилди.

Томонлар алоҳида лотларнинг жойлашуви, ер майдонларидан фойдаланиш шартлари ва аукционларда иштирок этиш тартиби, шунингдек, қурилишнинг техник параметрлари, муҳандислик-коммуникация тармоқларига уланиш ҳамда шаҳарсозлик талабларини муҳокама қилдилар.

Покистонлик инвесторлар Янги Тошкент шаҳри ҳудудида замонавий турар жой мажмуалари билан бир қаторда меҳмонхоналар, бизнес марказлари, савдо ва хизмат кўрсатиш объектларини қамраб олган кўп функцияли лойиҳаларни амалга оширишга қизиқиш билдирди.

Бўлиб ўтган музокаралар якунида томонлар дастлаб аниқ инвестиция лойиҳаларининг концепциялари, архитектуравий ечимлари, ер майдонига бўлган эҳтиёж ва дастлабки молиявий ҳисоб-китобларини ишлаб чиқиш, шундан сўнг қўшимча музокаралар ўтказиш мақсадида “Vision Group” компанияси раҳбариятининг Тошкентга навбатдаги ташрифини ташкил этиш масаласида келишувга эришдилар.

“Мамлакатингиз элчихонасининг Янги Тошкент шаҳри лойиҳасида иштирок этиш таклифи бизда катта қизиқиш уйғотди. Шу боис компаниямиз делегацияси билан Ўзбекистонга келдик. Бу Ўзбекистонга илк ташрифимиз. Дастлаб юртингизда бундай имкониятлар мавжудлигига ишонмаган эдик, — деди покистонлик инвестор Абдул Реҳман Хан. — Покистонда бир нечта йирик лойиҳаларни амалга оширганмиз. Катта иш тажрибасига эгамиз, десам, муболаға бўлмайди. Сафаримиз давомида мазкур мега-лойиҳада иштирок этиш бўйича самарали музокаралар ўтказдик. Эндиги вазифамиз ўзбекистонлик ҳамкорлар билан биргаликда тез фурсатда амалий ҳаракатларни бошлашдан иборат”.

Эслатиб ўтамиз, жорий йилнинг 14 октябрь куни Ўзбекистон элчиси Алишер Тўхтаев Покистоннинг “Vision Group” компаниялар гуруҳи раҳбарияти билан музокаралар ўтказган эди.