ЛОНДОН, 12 июнь. /“Дунё” АА/. Ўзбекистоннинг IT салоҳиятини халқаро майдонда тарғиб қилиш мақсадида Буюк Британияда “Digital Uzbekistan” биринчи бизнес-форуми ташкил этилди, деб хабар бермоқда “Дунё” АА мухбири.

Ўзбекистон элчихонаси “IT Park” билан ҳамкорликда ташкил этилган тадбирда 70 дан ортиқ иштирокчи, жумладан, Британиянинг етакчи технологик компаниялари ва ташкилотлари вакиллари иштирок этди.

Форум давомида “IT Park”нинг еттита стартаплари – “Datox”, “Moneff”, “Deepen”, “Geomotive”, “Fido Studio”, “KPI” ва “Aura OS” намойиш этилди.

Бундан ташқари, делегация вакиллари дунёнинг энг йирик технология кўргазмаларидан бири бўлган “London Tech Week 2026” да иштирок этди. Марказий Осиёга бағишланган махсус стендда Ўзбекистоннинг IT компаниялари ва стартаплари ўз маҳсулот ҳамда хизматларини халқаро аудитория эътиборига ҳавола қилди.

Ташриф доирасида B2B форматидаги бир қатор учрашувлар ҳам бўлиб ўтди. Хусусан, “Schwarz Digits” компаниясининг IT бўлинмаси раҳбарияти билан ўтказилган музокараларда Ўзбекистон компанияларининг рақамли хизматлар экспортини кенгайтириш ва халқаро технологик ҳамкорликни ривожлантириш масалалари муҳокама қилинди.

Ўтказилган тадбирлар Ўзбекистоннинг минтақавий “IT-hub” сифатидаги мавқеини мустаҳкамлаш, маҳаллий стартаплар ва компанияларни глобал бозорларга олиб чиқиш, шунингдек, мамлакатнинг рақамли иқтисодиёт соҳасидаги имкониятларини кенгроқ тақдим этиш йўлида муҳим қадам бўлди.