БУХОРО, 1 март. /"Дунё" АА/. Покистонда  фармацевтика, тўқимачилик, транспорт-логистика, қурилиш материаллари, туризм, тери ва жунни қайта ишлаш соҳаларида фаолият юритувчи бизнес доира вакилларидан иборат делегация Ўзбекистон элчиси Алишер Тўхтаев ҳамроҳлигида Бухоро вилоятига борди, деб хабар қилмоқда "Дунё" АА мухбири.

Ташриф дастурига кўра, дастлаб Бухоро вилояти ҳокими Ботир Зокиров иштирокида давра суҳбати бўлиб ўтди. Унда хорижий ҳамкорларга вилоятнинг туризм, тўқимачилик, фармацевтика, нефть ва газни қайта ишлаш, қурилиш материаллари ишлаб чиқариш ва саноатнинг бошқа йўналишларидаги салоҳияти ҳақида тақдимот ўтказилди.

Вилоятдаги тўқимачилик корхоналари экспорт салоҳиятини янада ошириш мақсадида Покистоннинг "Fateh" ва "Tabba" компанияларини ташқи бошқарув жараёнларига жалб этиш, покистонлик сайёҳлар оқимини ошириш мақсадида 2025 йил май ойида Лаҳор ва Карачи шаҳарларида Бухоро вилояти туристик салоҳиятига бағишланган "роад шоу" ташкил этиш тўғрисида келишиб олинди.

"Алабуга" эркин индустриал зонасига ташриф чоғида мазкур ҳудудда Покистоннинг "Diners" компанияси билан ип-калава ва сунъий тола аралашмасидан мато ишлаб чиқариш лойиҳасини амалга ошириши, "Herbion" компанияси билан эса доривор ўсимликларни сақлаш омборини ташкил этиши юзасидан келишувга эришилди.

Маҳаллий "Lattico" компанияси покистонлик ҳамкорлар билан пишлоқ ва сут маҳсулотлари, жумладан кефир, сметана ва творогни экспорт қилиш бўйича савдо шартномаси тузди. Покистоннинг "1001" компанияси билан Бухоро вилоятида атир совун ишлаб чиқариш заводини қуриш лойиҳаси ишлаб чиқилди.

Шунингдек, "Бухоро агрокластер" ҳудудида "Diners" компанияси томонидан уй текстили ишлаб чиқариш лойиҳасини амалга оширишга келишилди, "Бухоро сера импекс" компанияси томонидан Покистонга олтингугурт етказиб бериш бўйича шартнома имзоланди.

Ғиждувон туманидаги "Бухоро Файз" компанияси негизида мато ишлаб чиқариш ва бўяш бўйича лойиҳа шартлари келишилди.

Жондор туманига сафар доирасида "Hub Leather" компанияси билан дастлабки босқичда терини қайта ишлаш бўйича лойиҳани амалга ошириш, "Жондор парранда чикен" ва Покистоннинг "Forza Roma" компаниялари ўртасида паррандачилик соҳасида ҳамкорлик қилишга келишиб олинди.

Сафар давомида Жондор тумани ва Гужрат шаҳри мебель ишлаб чиқарувчилари ўртасида онлайн учрашув ташкил этилди. Гужрат шаҳри мебель ишлаб чиқарувчиларининг жорий йил апрель ойида ҳамкорларнинг истиқболли лойиҳаларини муҳокама қилиш учун Бухорога ишчи сафарини ташкил этиш таклифи қўллаб-қувватланди.

Шофиркон туманига ташриф чоғида покистонлик шериклар билан "Амиртекс" фабрикаси негизида халқаро брендлар остида маҳсулот ишлаб чиқариш ва уни Европа ҳамда Америка бозорларига экспорт қилиш юзасидан аҳдлашилди.

Томонлар, шунингдек, терини қайта ишлаш ва табиий ўсимликлардан дори воситалари ишлаб чиқариш бўйича лойиҳаларни муҳокама қилдилар.