КУАЛА-ЛУМПУР, 17 август. /"Дунё" АА/. Ўзбекистон элчиси Каромиддин Гадоев Малайзиянинг "Etika Dairies Sdn Bhd" компанияси ишлаб чиқариш заводига ташриф буюриб, экспорт бўйича компания бош менежери Чанг Жен Чунг билан учрашув ўтказди, деб хабар қилмоқда "Дунё" АА мухбири.



Мулоқот аввалида Жен Чунг компания фаолияти тўғрисида тақдимот ўтказди. Унинг айтишича, компания кўп йиллардан буён "Ҳалол" стандартлари асосида сут маҳсулотлари ва салқин ичимликларни ишлаб чиқариш ҳамда етказиб бериш бўйича мамлакатда етакчи ўринлардан бирини эгаллаб келмоқда.

Компаниянинг улкан тажрибаси ва салоҳияти, шунингдек мамлакатимизда табиий сут ва сархил меваларни қайта ишлаш учун хомашё базаси мавжудлигини инобатга олган ҳолда, Малайзия томонига "Ҳалол" стандартлари асосида Ўзбекистон ҳудудларида сут маҳсулотлари ва қуруқ сут, салқин ичимликлар, турли хил шарбатларни ишлаб чиқариш бўйича лойиҳаларни ўзаро ҳамкорликда амалга ошириш бўйича таклифлар билдирилди.

"Ўзбекистон аҳолиси сони ва мамлакатнинг тез суратларда ривожланиб бораётганлигини инобатга олиб, мамлакатингиз бозори компаниямиз учун қизиқарли бўлиши мумкин. Компания маҳсулотларига бўлган талабни ўрганиш, мавжуд хомашё базасини инобатга олган ҳолда ишлаб чиқариш имкониятларини таҳлил қилиш учун вакилларимизни Ўзбекистонга юборишга тайёрмиз", – деди бош менежер Чанг Жен Чунг.

"Etika Holding" 1973 йилда ташкил этилган. Компания томонидан 18 та бренд остида салқин ичимликлар ва сут маҳсулотлари ишлаб чиқарилади. Маҳсулотлар эса Малайзия, Сингапур ва Бруней сингари давлатларига экспорт қилинмоқда. Холдингда 1,9 мингта ишчи фаолият юритади. "Etika Dairies Sdn Bhd" компанияси холдинг таркибида 1996 йилда ташкил этилган бўлиб, у турли хил сут маҳсулотлари ишлаб чиқаришга ихтисослашган.