БУДАПЕШТ, 9 ноябрь. /"Дунё" АА/. Ўзбекистон элчиси Ойбек Шахавдинов "Business Club Eastern Europe" клубида Венгрия ишбилармон доиралари вакиллари билан учрашув ўтказди, деб хабар қилмоқда "Дунё" АА мухбири.

Венгриянинг 20 дан ортиқ етакчи компаниялари вакиллари қатнашган тадбирда Ўзбекистоннинг савдо-иқтисодий ва инвестициявий  имкониятлари ҳақида батафсил сўзлаб берилди. Ўзбекистон ва Венгрия ўртасидаги икки томонлама ҳамкорлик жадал ривожланиб бораётганидан далолат берувчи ижобий тенденциялар, юртимизда амалга оширилаётган ислоҳотлар ва уларнинг самарали натижалари қайд этилди.

Ўзбекистон  расмий вакили юртимизда Венгрия бизнеси учун салмоқли салоҳият мавжудлигини таъкидлади. Хусусан, "Inpark" компанияси билан ҳамкорликда Ўзбекистонда Венгрия саноат паркини ташкил этиш режалари катта қизиқиш уйғотди. Қайд этилганидек, ушбу лойиҳа мамлакатлар ўртасидаги саноат алоқаларини мустаҳкамлашга салмоқли ҳисса қўшади.

Бундан ташқари, элчи учрашув иштирокчиларини 5 декабрь куни Термиз шаҳрида бўлиб ўтадиган бизнес тадбирда иштирок этишга таклиф қилди. Таъкидланганидек, бу Сурхондарё вилоятининг инвестициявий салоҳияти билан яқиндан танишиш, шунингдек, истиқболли инвестиция лойиҳаларини муҳокама қилиш ва маҳаллий тадбиркорлар билан В2В  шаклида учрашувлар ўтказиш учун ноёб имконият яратади.

Тақдимотдан сўнг тадбиркорлар билан очиқ мулоқот ўтказилди. Венгрия компаниялари вакиллари Ўзбекистоннинг юқори иқтисодий ўсиш даражаси ва салмоқли салоҳиятини қайд этиб, ҳамкорлик алоқаларини ўрнатишдан манфаатдор эканлигини билдирди.

Иштирокчилар, шунингдек, Ўзбекистон бозорининг жозибадорлигини, республикада кенг кўламли ислоҳотлар муваффақиятли амалга оширилаётганини, хорижий инвесторлар учун қулай шарт-шароитлар яратилаётганини алоҳида урғуладилар.

Бундан ташқари, венгер компаниялари раҳбарлари мамлакатимизнинг ишбилармонлик муҳити билан танишиш, потенциал лойиҳаларни баҳолаш ва келгусида ҳамкорлик ришталарини боғлаш, мамлакатимиз тадбиркорлари билан тўғридан-тўғри алоқаларни ўрнатиш мақсадида Ўзбекистонга сафар қилиш режалари ҳақида маълум қилдилар.