ҚАҲРАМАНМАРАШ, 21 август. /"Дунё" АА/. Мамлакатимиз элчихонаси томонидан "Аrikan Group" компанияси билан биргаликда Туркиянинг Қаҳраманмараш вилоятида Ўзбекистоннинг савдо-иқтисодий ва инвестициявий салоҳиятга бағишланган давра суҳбати ташкил этилди, деб хабар қилмоқда «Дунё» АА мухбири.

Тадбирда Туркиянинг "Kipaş Holding", "Nartex" "Molcem Nano", "Temsan Makina", "Sirikcioglu", "Elif Iplik" ва бошқа етакчи компаниялари раҳбарлари иштирок этди.

Унда халқаро ва Туркия тўқимачилик бозорлари таҳлили, маҳаллий корхоналар билан ҳозирги кундаги ҳамкорлик алоқалари ва келгусидаги режалар атрофлича муҳокама қилинди.

"Аrikan Group" раҳбари Туркияда тўқимачилик саноати айни пайтда мураккаб шароитда эканлигини қайд этиб, баъзи компаниялар ташқи бозорларга ўз ишлаб чиқариш қувватларини "релокация» қилиш имкониятларини ўрганиб чиқаётганини билдирди.

"Моlcem Nano" компанияси ишлаб чиқариш қувватларининг бир қисмини аллақачон Тошкент вилоятидаги «Чирчиқ» технопаркига кўчиргани таъкидланди ва корхона фаолияти ҳақида тақдимот қилинди. Шунингдек, "Elif Iplik" компанияси Ўзбекистондан Туркияга тўқимачилик маҳсулотларини экспорт қилиш ва маҳаллий корхоналар билан қўшма лойиҳаларни амалга оширишга қизиқиш билдирди.

Тадбир якунида ушбу икки компания билан Ўзбекистондаги фаолиятини кенгайтириш бўйича келишувга эришилди.

Келишувга кўра, "Arikan Group"нинг R&D гуруҳи билан ҳамкорликда тўқимачилик соҳасида қўшма ишлаб чиқариш лойиҳаларини амалга ошириш, шунингдек, Туркияда ўзбек корхоналари учун маркетинг офисларини очиш имкониятлари ўрганилади.

Давра суҳбати доирасида яна бир муҳим келишув "Arikan Group" ҳамда Тошкент тўқимачилик ва енгил саноат университети билан биргаликда туркий халқлар миллий либослари дизайнларига бағишланган нуфузли биеннале ташкил этиш бўлди.

Шунингдек, Туркия томонининг шу йил 9-11 сентябрь кунлари бўлиб ўтадиган "TextileExpo" халқаро кўргазмасида иштирок этиши учун Ўзбекистонга бизнес-миссиясини ташкил этишга келишилди.

Таъкидлаш жоизки, Қаҳраманмараш тўқимачилик сектори ўз рақобатбардошлигини тиклаш учун янги бозорларга интилмоқда. Ўзбекистон эса ўзининг қулай логистикаси, арзон ресурслари ва саноат технопарклари орқали турк инвесторлари учун жозибали манзилга айланяпти. Ушбу ҳамкорлик нафақат ишлаб чиқариш соҳасини, балки инновациялар ва маданий алмашинувни ҳам қамраб олади.