САМАРҚАНД, 6 сентябрь. /“Дунё” АА/. БМТ Бош котибининг ёшлар масалалари бўйича ёрдамчиси, Ёшлар офиси раҳбари Фелипе Паульер “Дунё” АА мухбирига эксклюзив интервью бериб, Самарқандда бўлиб ўтаётган Ёш парламент аъзоларининг XII глобал конференцияси ҳақида ўз фикрларини билдирди.

– Парламентлараро иттифоқ ва Ўзбекистон ҳукумати таклифига биноан Самарқандга келганимдан жуда хурсандман. Бу ерда Ёш парламентарийлар конференциясида иштирок этиб, нутқ сўзлаш имконига эга бўлдим.

Ўзбекистон парламентлараро ҳамкорликни кенгайтиришда муҳим ва етакчи роль ўйнамоқда. БМТ Бош Ассамблеясида парламентларнинг глобал муаммоларни ҳал этиш ва Барқарор ривожланиш мақсадларини амалга оширишдаги ролини эътироф этувчи резолюция қабул қилинган.

Ноаниқликлар тобора кучайиб бораётган бугунги дунёда парламентларнинг инсон ҳуқуқларини ҳимоя қилишда фаол иштирок этиши жуда муҳим. Дунёда давом этаётган низолар, иқлим ўзгариши ва рақамли соҳадаги жадал трансформация жараёнлари шароитида парламентларнинг бу борадаги фаолияти янада долзарб аҳамият касб этмоқда.

Бу ҳақида ёш парламентарийлар жам бўлган залда гапириш, айниқса, муҳим. Чунки улар ёшларнинг ижтимоий ва сиёсий жараёнларда фаол иштирок этиши учун кенг имкониятлар яратиш, очиқ ва инклюзив институтларни шакллантириш ҳамда авлодлар ўртасида адолатни таъминлашда етакчи роль ўйнайди. Бугун бундай ёндашувга эҳтиёж ҳар қачонгидан-да юқори.

Ёшларни турли жараёнларга жалб этиш ва иштирокини таъминлаш ҳақида гап кетганда, бу бир авлодни бошқасига қарама-қарши қўйиш дегани эмас. Аксинча, гап катта авлоднинг тажрибаси ва ҳаётий сабоқларини ёшларнинг замонавий кўникмалари, ғоялари ва имкониятлари билан уйғунлаштириш ҳақида бормоқда.