КАРДИФФ, 14 июль. /"Дунё" АА/. Мамлакатимиз элчихонаси томонидан Буюк Британиянинг Уэльс маъмурий-сиёсий ҳудуди пойтахти Кардифф шаҳрида Ўзбекистоннинг савдо-иқтисодий ва инвестициявий салоҳиятига бағишланган бизнес-форум ташкил этилди, деб хабар қилмоқда "Дунё" АА мухбири.

Бизнес-форумда Уэльс Тараққиёт банки, Таълим ҳамкорлиги ташкилоти (WEPco), Савдо палатаси ҳамда "United Concrete Canvas", "Deploy", "KPX Entertainment Technology", "Capital Law" сингари етакчи компаниялар раҳбарлари ва вакиллари қатнашди.

Форум иштирокчиларига Ўзбекистонда олиб борилаётган кенг кўламли ислоҳотлар, шу жумладан миллий иқтисодиётни ривожлантиришни қўллаб-қувватлаш борасида амалга оширилаётган чора-тадбирлар тўғрисида батафсил сўзлаб берилди.

Бундан ташқари, республикада қайта тикланадиган энергетика, кимё саноати, металлургия, электротехника, фармацевтика, озиқ-овқат саноати ва таълим соҳаларида аниқ инвестициявий лойиҳалар бўйича тақдимотлар ўтказилди.

Хориж томони сўнгги йилларда Ўзбекистонда инвестициявий муҳит сезиларли даражада яхшиланганлигини, халқаро компанияларнинг мамлакатимизда бизнес юритишга қизиқиши ортиб бораётганини таъкидладилар. Шунингдек, молия-банк, таълим, атроф-муҳитни муҳофаза қилиш, йирик давлат компанияларнинг хусусийлаштириш жараёнида қатнашишга қизиқиш билдирилди.

Бизнес-форум якунида Уэльс ва Ўзбекистон ҳудудлари ўртасида ҳамкорлик алоқаларини ўрнатиш ҳамда юқорида кўрсатилган соҳаларда аниқ лойиҳаларни ишлаб чиқиш бўйича келишувга эришилди.