ШЭНЬЧЖЭНЬ, 19 декабрь. /“Дунё” АА/. Наманган вилояти ҳокими Шавкат Абдураззаков бошчилигидаги делегациянинг Хитойга ташрифи доирасида Гуандун провинциясининг Шэньчжэнь шаҳрида “Ўзбекистон-Хитой: cавдо-иқтисодий ва инвестиция форуми” бўлиб ўтди, деб хабар бермоқда “Дунё” АА мухбири.

Ўзбекистон-Хитой савдо-саноат палатаси билан ҳамкорликда ташкил этилган йирик тадбирда шаҳар муниципалитетининг раҳбарияти ва 500 дан ортиқ етакчи компаниялари иштирок этди. G2B ва B2B форматида ташкил этилган самарали музокаралар давомида 27 та инвестиция лойиҳасини амалга ошириш бўйича келишув ва англашув ҳужжатлари имзоланди.

Форум доирасида Наманган вилояти билан бир қаторда Навоий ва Бухоро вилоятлари, Қорақалпоғистоннинг савдо-иқтисодий, инвестиция ва туризм салоҳияти, шунингдек, “Ўзметкомбинат” АЖнинг мамлакатимиз тоғ-кон саноатидаги имкониятлари тақдимотлари ўтказилди.

Шунингдек, Наманган вилоят ҳокимлиги делегациясининг 30 дан ортиқ маҳаллий компаниялар билан ўтказган давра суҳбатида қурилиш материаллари, электротехника, қишлоқ хўжалиги, энергетика, АКТ, туризм, таълим ва тиббиёт каби йўналишлардаги ҳамкорлик истиқболлари муҳокама қилинди.

Мазкур форум мамлакатимиз ҳудудларининг халқаро инвестицион жозибадорлигини ошириш ҳамда ўзаро манфаатли ҳамкорликни янги босқичга олиб чиқишда муҳим аҳамият касб этди.