СТОКГОЛЬМ, 5 июнь. /"Дунё" АА/. Швеция парламентида Ўзбекистон элчихонаси ва Риксдагдаги Марказий Осиё парламентлари дўстлик гуруҳи билан биргаликда мамлакатимизнинг инвестициявий салоҳиятига бағишланган бизнес-семинар ўтказилди, деб хабар қилмоқда "Дунё" АА мухбири.

Унда дўстлик гуруҳи раиси Бьёрн Сёдер, Риксдаг депутатлари, Ташқи ишлар вазирлиги, Савдо палатаси, "ISDP" ва "SCEEUS" тадқиқот институтлари, "Ericsson", "Epiroc", "AstraZeneca", "TXL", "Mec Holding", "ABB", "Calluna Mining Solutions", "INPIPE", "Decel" каби компаниялар вакиллари иштирок этди.

Бизнес-семинар қатнашчилари Ўзбекистоннинг иқтисодий ва инвестициявий салоҳияти, хорижий инвесторлар учун яратилган имконият ва шарт-шароитлар билан танишдилар.

Анжуманда дўстлик гуруҳи раиси Бьёрн Сёдер, Швециянинг мамлакатимиздаги элчиси Томас Данестад, , "ISDP" ва "SCEEUS" ақл марказлари директорлари Сванте Корнелл ва Йохан Энгвалл сўзга чиқиб, сўнгги йилларда Марказий Осиёда, хусусан Ўзбекистонда бизнес муҳитини яхшилаш борасида олиб борилаётган ислоҳотларни юқори баҳолашди.

Шунингдек, семинар доирасида швед компаниялари вакиллари билан Ўзбекистонга инвестиция киритиш масалалари муҳокама қилинди, иштирокчиларни қизиқтирган саволларга батафсил жавоб берилди.

 Тадбир якунида Риксдагдаги Марказий Осиё парламентлари дўстлик гуруҳи билан бу каби тадбирларни мунтазам ташкил этиш ва Ўзбекистонга Швеция ишбилармон доиралари вакилларининг бизнес-миссияларини уюштириш юзасидан келишиб олинди.