ЧЕЛЯБИНСК, 15 сентябрь. /"Дунё" АА/. Россиянинг Челябинск шаҳрида имконияти чекланган аёллар ўртасида "Ғолиблик учун туғилганлар" IX халқаро ижтимоий-маданий истеъдодлар фестивали бўлиб ўтди, деб хабар қилмоқда "Дунё" АА мухбири.

Ўзбекистоннинг Екатеринбург шаҳридаги Бош консулхонаси кўмагида Оила ва хотин-қизлар қўмитаси Сурхондарё вилояти ҳудудий бошқармаси бош мутахассиси Замира Омонованинг мазкур фестивалда иштироки ташкил этилди. Бу йилги фестивалда, шунингдек, Россия, Қозоғистон ва Арманистон вакиллари иштирок этди.

Таъкидлаш жоизки, Ўзбекистон вакили мазкур танловда биринчи марта қатнашди. Фестиваль дастури доирасида Замира Омонова турли йўналишдаги ўқитувчиларнинг маҳорат сабоқлари ва дарсларида қатнашди, шунингдек, бошқа мамлакатлардан келган иштирокчилар билан ижтимоий-маданий йўналишда тажриба алмашди.

Фестиваль якунида ҳамюртимиз Ўзбекистоннинг бой маданияти ва анъаналари акс эттирувчи мусиқий чиқишларини тақдим этди.

Ҳамюртимизнинг чиқиши ташкилотчилар ва томошабинлар томонидан юқори баҳоланди.