ТОКИО, 4 сентябрь. /"Дунё" АА/. Япония пойтахтида ўтаётган "Tokyo International Gift Show" халқаро кўргазмасида "Made in Uzbekistan" миллий стенди намойиш этилмоқда, деб хабар қилмоқда "Дунё" АА мухбири.

Юзинчи бор ўтказилаётган ушбу кўргазмасидаги юртимиз стенди Республика "Ҳунарманд" уюшмаси томонидан Ўзбекистон элчихонаси ва Савдо-саноат палатаси ҳузуридаги Савдони ривожлантириш компанияси кўмагида ташкил этилди.

Халқаро тадбирда юртимизнинг турли ҳудудларидан таниқли ҳунармандлар иштирок этиб, темирчилик, каштачилик, миниатюра санъати, миллий либослар, зардўзлик, кулолчилик, шунингдек, жун ва ипак маҳсулотларини тақдим қилмоқда.

Шунингдек, кўргазмада дунёнинг 22 мамлакатидан 822 та хорижий компания, шу жумладан, МДҲ ва Марказий Осиё минтақасидан фақат Ўзбекистон иштирок этаяпти.   

Тадбир Ўзбекистон ҳунармандлари учун халқаро ҳамкорлик ва экспорт алоқаларини кенгайтириш учун муҳим платформа вазифасини ўтамоқда.

Ярмарка доирасида Япониянинг "Amina Collection" компанияси томонидан махсус ҳунармандчилик павильони ташкил қилинди. Унда Риштон кулолчилик мактаби вакилларининг маҳсулотлари тақдим этиляпти.

"Tokyo International Gift Show" халқаро кўргазмаси 5 сентябрга қадар давом этади.

 Ямагучи Чичи, тадбиркор:

– Мен бу йил баҳор фаслида Ўзбекистонга ташриф буюриш имкониятига эга бўлдим. Хусусан, Фарғона вилоятидаги Марғилон шаҳрида миллий атлас ва адрас матолари билан яқиндан танишдим. Уларнинг ранг-баранглиги, юксак санъат даражасидаги нақшлари ва бадиий қиммати мени чуқур ҳайратга солди. Шунинг учун ҳам япон истеъмолчиларига манзур келадиган айрим турдаги атлас ва адрас матоларини олиб келиб, Японияда савдосини йўлга қўйдим.

Айни пайтда ўзбек миллий атлас ва адрасларидан япон кимонолари учун белбоғлар тайёрлашда кенг фойдаланилмоқда ва бу маҳсулотларга талаб кундан-кунга ортиб бормоқда.

"Tokyo International Gift Show" кўргазмасида Ўзбекистон миллий стенди ташкил этилгани ҳақида эшитиб, уни кўришга қарор қилдим. Бу кўргазмада иштирок этиш орқали нафақат янгидан-янги ҳамкорлар топиш, балки Ўзбекистоннинг бетакрор ҳунармандчилик маҳсулотларини янада кўпроқ одамларга танитиш имконияти яратилганидан жуда мамнунман.

Ацуко Кубо, туроператор:

– Мен туроператор сифатида фаолият юритаман ва бир неча бор Ўзбекистонда бўлганман. Юртингизнинг бетакрор миллий ҳунармандчилик анъаналари менда катта қизиқиш уйғотгани учун сайёҳлар учун асосан ҳунармандчилик йўналишидаги турларни ташкил қиламан.

Бу турлар давомида сайёҳлар нафақат ҳунармандчилик маҳсулотларини харид қиладилар, балки маҳаллий усталардан бевосита сабоқ олиб, ўз қўллари билан турли буюмлар тайёрлаш тажрибасига ҳам эга бўладилар.

Ўзбек миллий ҳунармандчилиги жуда хилма-хил, бетакрор ва жозибадор. Уларни кўрган ҳар бир сайёҳ Ўзбекистон мухлисига айланади. Мен кўргазма фаолиятига улкан муваффақият тилайман ва ишонаманки, бундай тадбирлар орқали Ўзбекистон ҳунармандчилиги жаҳонга яна кенгроқ танилади.