РИМ, 26 май. /“Дунё” АА/. Италиянинг “Informare Online” нашрида Ўзбекистоннинг Марказий Осиёдаги тарихий ва замонавий маркази сифатидаги ролига бағишланган мақола эълон қилинди, деб хабар бермоқда “Дунё” АА мухбири.

Муаллиф Кампания университети профессори, ЮНЕСКОнинг Казертадаги вакили Йоланда Каприльоне Ўзбекистонни “Буюк Ипак йўлининг жонли юраги” дея атаган. У мақолада ўзбеклар диёрида жаҳон сиёсати, иқтисодиёти ва маданий дипломатия тобора ривожланиб бораётганини алоҳида таъкидлайди.

Нашрда ёзилишича, Ўзбекистонда Президент Шавкат Мирзиёев раҳбарлигида амалга оширилаётган ислоҳотлар, туризм, таълим ва маданий меросни асраб-авайлашга алоҳида эътибор қаратилмоқда.

Тарихий Самарқанд, Бухоро, Хива ва Шаҳрисабз шаҳарларини реставрация қилиш бўйича кенг кўламли лойиҳалар, шунингдек, Ўзбекистоннинг ЮНЕСКО билан фаол ҳамкорлиги муҳим аҳамият касб этмоқда. Хивадаги “Марказий Осиё жаҳон цивилизациялари чорраҳасида” форуми ҳамда ЮНЕСКО Бош конференциясининг 43-сессиясининг Самарқандда ўтказилиши муҳим халқаро тадбирлар қаторида қайд этилган.

Материалда Ўзбекистоннинг Марказий Осиёда минтақавий ҳамкорликни мустаҳкамлаш, сунъий интеллект, инклюзив таълим ва маданий алмашинув соҳаларида замонавий ташаббусларни илгари суриш борасидаги саъй-ҳаракатлари алоҳида таъкидланган.