МОСКВА, 25 сентябрь. /“Дунё” АА/. Россиянинг “Комсомольская правда” газетаси Ўзбекистоннинг рақамли трансформациясини ривожлантириш ва мамлакатнинг АҚШ билан технологик ҳамкорлигини кенгайтиришга эътибор қаратди, деб хабар бермоқда “Дунё” АА мухбири.

Эълон қилинган мақолада қайд этилишича, Ўзбекистон Президенти Администрацияси раҳбари Саида Мирзиёева АҚШга ташрифи чоғида Америка корпорациялари ва молия институтлари вакиллари билан музокаралар олиб борган.

Хусусан, АҚШ Халқаро молиявий тараққиёт корпорацияси (DFC) бош ижрочи директори Бен Блэк билан учрашувда умумий қиймати 900 миллион доллардан зиёд бўлган қўшма инвестиция лойиҳалари портфелини шакллантириш масалалари муҳокама қилинган. Платформа 2026 йил июнь ойида Ўзбекистон ва Америка молия институтлари иштирокида ишга туширилган.

Нашр “Google” билан сунъий интеллект, киберхавфсизлик, булутли технологиялар ва катта маълумотлар соҳаларидаги ҳамкорликка алоҳида эътибор қаратган. Газета маълумотларига кўра, Ўзбекистонда 737 мингдан ортиқ киши “Инсон + сунъий интеллект” дастури бўйича малака оширган.

2026 йил октябрь ойида Ўзбекистонда ҳозирда 12 та маҳаллий банкда синовдан ўтказилаётган “Google Pay” тизимини ишга тушириш режалаштирилгани маълум қилинган. Бундан ташқари, “Google Cloud Gemini” тил моделларига ўзбек тилининг жорий этилиши дастурчиларнинг миллий тилда рақамли маҳсулотлар яратиш имкониятларини кенгайтириши кутилмоқда.

“Комсомольская правда” нашрининг баҳолашича, ушбу лойиҳалар Ўзбекистоннинг рақамли инфратузилмасини ривожлантириш ва технологик салоҳиятини мустаҳкамлашга хизмат қилади.