ҚОҲИРА, 22 май. /"Дунё" АА/. Мисрнинг "Ал-Хабар ал-Йаум" ахборот агентлиги Наманганда бўлиб ўтаётган 63-халқаро гуллар фестивалига бағишланган мақолани тарқатди, деб хабар қилмоқда "Дунё" АА мухбири.

"Жорий йил 23 июнга қадар давом этадиган фестивалга 6 миллиондан ортиқ меҳмонлар, жумладан, 200 мингдан ортиқ хорижий сайёҳлар ташриф буюриши кутилмоқда, – дейилади нашрда. – Ўтган йили Наманганда ўтказилган гуллар фестивалида бир ой давомида дунёнинг 50 дан ортиқ давлатидан 4 миллионга яқин сайёҳ келган". 

 Агентлик маълум қилганидек, фестиваль анъанавий автомобиллар паради билан бошланди. Наманган халқаро аэропортидан то Заҳириддин Муҳаммад Бобур номидаги маданият ва истироҳат боғигача бўлган 10 километрдан ортиқ масофани гуллар билан безатилган турли русумдаги 200 дан ортиқ автомобиллар босиб ўтди.

Нашрда таъкидланганидек, гўзаллик ва нафосат байрамида Озарбайжон, Ҳиндистон, Нидерландия, Хитой, Жанубий Корея, Туркия ва Япония вакиллари иштирок этмоқда.

"Фестиваль Ўзбекистоннинг гулчилик санъати маркази сифатидаги мавқеини яна бир карра тасдиқлади. Бутун дунёдан юзлаб иштирокчилар ўзларининг ноёб композицияларини намойиш этиш, Ўзбекистон табиатининг гўзаллиги ва ранг-баранглигидан баҳраманд бўлиш учун  Наманганга ошиқмоқда", – деб ёзган "Ал-Хабар ал-Йаум".