ВАРШАВА, 2 октябрь. /“Дунё” АА/. Польшанинг “PAP MediaRoom” ахборот платформасида IREG Рейтинглар обсерваторияси ижрочи директори Кажимьеж Билановнинг “Ўзбекистон цивилизацион юксалиш сари интилмоқда” сарлавҳали мақоласи эълон қилинди, деб хабар бермоқда “Дунё” АА мухбири.

Мақолада Варшава университетида “Ўзбекистон – 2030” стратегиясига бағишлаб ўтказилган конференцияда Польша собиқ президенти Александр Квасьневский мамлакатимиздаги янгиланишлар ва очиқлик сиёсатини юқори баҳолагани қайд этилган.

Материалда 2025 йилда Ўзбекистоннинг реал ЯИМ ҳажми 7,7 фоизга, 2026 йилнинг биринчи чорагида эса 8,7 фоизга ўсгани кўрсатиб ўтилган. Шунингдек, мамлакатнинг бой ресурс салоҳияти, туризм соҳасининг ривожланиши, хусусан, “LOT” авиакомпаниясининг Варшава ва Тошкент ўртасида тўғридан-тўғри авиақатновларни йўлга қўйгани, шунингдек, Самарқандда ўтказилган “Европа Иттифоқи – Марказий Осиё” саммитида стратегик шериклик тўғрисидаги декларация қабул қилингани эътироф этилган.

Муаллиф инсон капиталига алоҳида эътибор қаратган. Аҳоли сони 37 миллиондан ошгани, ўртача ёш қарийб 29,5 ёшни ташкил этиши қайд этилган.

Якунда Польша ва Ўзбекистон ректорларининг III форуми, “Марказий Осиё – Европа Иттифоқи” ректорлар конгресси ҳамда “Perspektywy” фонди лойиҳалари доирасида мустаҳкамланаётган академик ҳамкорлик икки томонлама узоқ муддатли шериклик учун мустаҳкам пойдевор яратаётгани хулоса қилинган.