АР-РИЁЗ, 23 апрель. /"Дунё" АА/. Саудия Арабистонининг "Sahm News" газетасида "КАДҲК – Марказий Осиё: Минтақавий дипломатиянинг янги модели" сарлавҳали мақола эълон қилинди, деб хабар қилмоқда "Дунё" АА мухбири.

Мақолада Кўрфаз араб давлатлари ҳамкорлик кенгаши ва Марказий Осиё давлатлари ўртасидаги ҳамкорлик формати минтақалараро ўзаро ҳамкорликнинг ўзига хос моделини ифодалаши қайр этилган.

 Муаллифнинг ёзишича, бу форматнинг ўзига хослиги шундаки, у иккита геостратегик муҳим минтақани бирлаштиради, уларнинг ҳар бири ўзига хос ривожланишга эга, лекин айни пайтда чуқур тарихий, маданий ва диний алоқаларга эга.

Таъкидланишича, КАДҲК ва Марказий Осиё ўртасида тизимли дипломатик мулоқотни шакллантириш бир неча муҳим босқичларни босиб ўтди ва уларнинг ҳар бири икки минтақа ўртасидаги ҳамкорликни ривожлантиришга катта ҳисса қўшди.

Қайд этилишича, 2023 йил 19 июль куни Саудия Арабистонининг Жидда шаҳрида Кўрфаз араб ҳамкорлик кенгаши ва Марказий Осиё давлатлари давлат раҳбарларининг биринчи тарихий саммити бўлиб ўтди. Мазкур воқеа икки минтақа ўртасидаги муносабатларда янги босқични бошлаб берди.

Бу икки томонлама ҳамкорликнинг кўп томонлама форматга ўтганини кўрсатади. Бу жараён минтақалар ўртасидаги муносабатларда янги саҳифа очган "КАДҲК – Марказий Осиё" тарихий биринчи саммити билан якунланди.

Шунингдек, биринчи саммитнинг энг муҳим натижаси 2023-2027 йилларга мўлжалланган КАДҲК ва Марказий Осиё давлатлари ўртасида қўшма ҳаракатлар режасининг қабул қилиниши бўлгани қайд этилган.

2025 йил май ойида Ўзбекистонда бўлиб ўтиши режалаштирилган Иккинчи "КАДҲК – Марказий Осиё" иккинчи саммитига фаол тайёргарлик бошланди. Саммит ўтказиладиган жой сифатида Марказий Осиёнинг энг қадимий шаҳарларидан бири, бой тарих ва маданий меросга эга Самарқанднинг танлангани рамзий маънога эга.

Қайд этилишича, иккинчи саммитга тайёргарлик биринчи саммитда эришилган келишувларни амалга ошириш ва бўлажак саммит кун тартибини шакллантиришга қаратилган қатор муҳим тадбирларни ўз ичига олади.

"Самарқандда бўлиб ўтадиган саммитдан кутилаётган натижалар икки минтақа ўртасидаги ҳамкорликни янада ривожлантиришни белгилаб берувчи янги стратегик ҳужжатларни қабул қилиш, қатор қўшма лойиҳа ва ташаббусларни амалга ошириш, ўзаро ҳамкорликнинг институционал асосларини мустаҳкамлашдан иборат. Рақамлаштириш, инновациялар, сунъий интеллект, барқарор иқтисодиёт ва интеллектуал қишлоқ хўжалиги масалаларига алоҳида эътибор қаратилади", – дейилган мақолада.