КИЕВ, 29 ноябрь. /“Дунё” АА/. Археологлар Ўзбекистонда 2300 йилдан кўпроқ вақт олдин мавжуд бўлган қалъа-шаҳар қолдиқларини топди, деб хабар қилмоқда “Дунё” АА мухбири.

Украинанинг нуфузли “The New Voice” нашрида ёзилишича, маҳаллий аҳоли ушбу диққатга сазовор жойни “Бабуртепа” номи билан билади. Тадқиқотларга кўра, шаҳар тахминан минг йил давомида аҳоли яшаган маскан бўлган.

Яқинда ўтказилган тадқиқотда келтирилишича, шаҳар 6 гектар (14,8 акр) майдонни эгаллаган ва эҳтимол, Бухорони Хоразм билан боғлайдиган муҳим савдо маркази бўлиб хизмат қилган.

“Икки йил давомида археологлар учта секторда қазиш ишларини олиб борди ва мустаҳкамлаш иншоотларининг қолдиқларини – қалъа, қўриқлаш постлари ва мудофаа деворларини топди. Лойиҳа раҳбари Санжар Абдураҳимовнинг таъкидлашича, шаҳарнинг марказий қисми, эҳтимол, сарой ёки маросим зали вазифасини бажарган. Бу ерда улар кенг хонани, унга туташ хоналарни ва ўша даврнинг бадиий анъаналари ҳақида тасаввур берувчи ёрқин деворий суратлар (фрескалар) парчаларини топган”, – деб ёзган мақола муаллифи.

Шаҳар ҳунармандчилик ишлаб чиқариш маркази бўлган. Археологлар кулолчилик устахоналари, тошга ишлов бериш жойлари, катта ҳажмли сақлаш идишлари ва кўплаб сопол буюмларни топишга муваффақ бўлди .

“Бу кашфиёт Қашқадарё воҳасида археологик фаолликнинг кучайиши фонида содир бўлди. 2025 йилда тадқиқотчилар 100 дан ортиқ аввал ҳужжатлаштирилмаган ёдгорликларни рўйхатга олди. Самарқанд институти қазиш ишларини узоқ муддатли лойиҳа сифатида давом эттиришни режалаштирмоқда”, – дея қайд этилган мақолада.