ИСЛОМОБОД, 8 март. /“Дунё” АА/. Покистоннинг “The World News” электрон нашрида Ўзбекистон ижтимоий-сиёсий ҳаётида кечаётган янгиликлар кенг ёритилмоқда, деб хабар бермоқда “Дунё” АА мухбири.

Хусусан, мазкур нашр Ўзбекистон Президенти Шавкат Мирзиёев Иордания Подшоҳи Абдулла II ибн aл-Ҳусайн билан телефон орқали суҳбатлашгани ҳақида ёзди.

Мулоқот давомида сўнгги кунларда Яқин Шарқда кузатилаётган жараёнларнинг кескин тус олиши минтақавий хавфсизлик, барқарорлик ҳамда давлатлараро муносабатларга жиддий путур етказаётгани алоҳида таъкидланди.

“Бутун мусулмон уммати учун муқаддас бўлган Рамазон ойида мамлакатлар суверенитети, фуқаролар тинчлиги ҳамда осойишталигига хавф туғдирадиган ҳар қандай хатти-ҳаракатларни зудлик билан тўхтатиш, низо ва муаммоларни тинч ва дипломатик йўллар билан ҳал этиш зарурлиги қайд этилди”, – дейилади манбада.

“The World News” нашри шунингдек, Президент Шавкат Мирзиёев Озарбайжон Президенти Илҳом Алиев билан телефон орқали мулоқот қилгани ҳақидаги хабарни тарқатди.

Таъкидланишича, суҳбат аввалида Ўзбекистон етакчиси Озарбайжон ҳудудига учувчисиз учиш аппаратлари билан уюштирилган ҳужумларни кескин қоралаб, жароҳат олганларнинг тез фурсатда соғайиб кетишини тилади.

Томонлар муборак Рамазон ойида рўй бераётган нахуш воқеалар умуминсоний қадриятларга, халқаро нормалар ва давлатларнинг ҳудудий яхлитлиги тамойилларига зид эканини таъкидлади.