КИEВ, 20 май. /“Дунё” АА/. “Euronews” Ўзбекистондаги меҳмондўстлик анъаналари ва мамлакатдаги меҳмон уйлари ҳақида мақола эълон қилди, деб хабар бермоқда “Дунё” АА мухбири “Kyiv Diplomatic” журналига таяниб.

Материалда мамлакатда меҳмондўстлик кундалик ҳаётнинг бир қисми бўлиб қолаётгани, кичик меҳмон уйлари эса сайёҳларга маданият ва оилавий анъаналар билан яқиндан танишиш имконини бериши таъкидланган.

Хусусан, мақолада Сурхондарёдаги меҳмон уйи эгаси Мажуда Назарованинг меҳмондўстлиги ҳақида тўхталиб ўтилган. Шу билан бирга, Бухорода ҳам кўплаб меҳмон уйлари мавжудлиги, уларнинг тарихий биноларда фаолият юритиши қайд этилган. Самарқанд ва Тошкентдаги бу каби уйларда эса миллий колорит, хонадон муҳити ва замонавий шароитлар уйғунлашгани таъкидланган.

Хорижий ОАВнинг ёзишича, айнан шундай меҳмон уйлари саёҳатчиларга Ўзбекистондаги ҳақиқий ҳаёт тарзини кўрсатиб, асрлар давомида сақланган меҳмондўстлик анъаналарини ҳис этишга ёрдам беради.