ВАШИНГТОН, 17 май. /“Дунё” АА/. Американинг “The Diplomat” онлайн нашри Ўзбекистонда футбол жадал ривожланаётгани ва миллий спортнинг халқаро миқёсда эътирофи ортиб бораётганига бағишланган мақола эълон қилди, деб хабар бермоқда “Дунё” АА мухбири.

Нашрда таъкидланишича, Ўзбекистон терма жамоасининг 2026-йилги футбол бўйича жаҳон чемпионатига йўлланма олиши мамлакат футболи тарихида янги босқич бошланишига ва унинг “олтин даври” шаклланишига туртки бўлиши мумкин.

Ўзбекистон Марказий Осиё ва Жанубий Кавказ мамлакатлари орасида биринчи бўлиб миллий терма жамоаси 2026-йилги жаҳон чемпионатига йўлланмани қўлга киритгани алоҳида қайд этилган. Нашрнинг баҳолашича, бу ютуқ бутун минтақа учун тарихий аҳамият касб этади.

Тараққиётнинг асосий омиллари қаторида ўзбек футболчиларининг Европанинг етакчи чемпионатларида кўпайиб бораётгани алоҳида кўрсатилган. Хусусан, Абдуқодир Ҳусановнинг “Ланс” клубидаги ўйинлари ва унинг ортиб бораётган халқаро нуфузига эътибор қаратилган.

Ёшлар футболида ҳам ижобий ўсиш кузатилмоқда. 2023-йилги Осиё кубоги ғолиби бўлган Ўзбекистон U-20 терма жамоаси миллий футболнинг халқаро майдондаги келгуси муваффақиятлари учун пойдевор сифатида қаралаётгани қайд этилган.

Мақолада аёллар футболини ривожлантиришга ҳам алоҳида тўхталиб ўтилган. Ўзбекистон аёллар терма жамоасининг 2026-йилги Осиё кубоги чорак финалига чиқиши, шунингдек, 2029 йилда мамлакатда аёллар ўртасидаги Осиё кубогининг ўтказилиши ушбу йўналишга қизиқишнинг янада ортишига хизмат қилиши таъкидланган.

Шунингдек, нашрда Ўзбекистоннинг спортдаги ютуқлари, жумладан, 2024-йилги ёзги Олимпия ўйинларидаги муваффақиятли иштироки мамлакатда профессионал спорт инфратузилмаси ва спортчиларни тайёрлаш тизими изчил ривожланаётгани алоҳида эътироф этилган.