ДОҲА, 17 апрель. /“Дунё” АА/. Қатарнинг “Business Leaders” журналида Ўзбекистоннинг сармоявий салоҳияти ва Ўзбекистон–Қатар муносабатларини ривожлантиришга бағишланган “Қатарнинг Ўзбекистонга киритган сармояси икки томонлама муносабатларни мустаҳкамлашга кучли сигнал беради” сарлавҳали мақола эълон қилинди, деб хабар бермоқда “Дунё” АА мухбири.

Мақолада Ўзбекистон элчиси Ашраф Хўжаевнинг эксклюзив шарҳи келтирилган бўлиб, у қисқа вақт ичида икки давлат ўртасидаги ҳамкорлик сифат жиҳатидан янги босқичга кўтарилганини таъкидлаган. Унинг сўзларига кўра, 2023 йилда Доҳада Ўзбекистон дипломатик ваколатхонаси очилганидан кейин ҳамкорлик янада тизимли, фаол ва аниқ натижаларга йўналтирилган бўлди.

Мақолада инвестиция йўналишига алоҳида эътибор қаратилган. Таъкидланишича, нафақат инвестициялар ҳажми, балки уларнинг ишончни шакллантиришдаги аҳамияти ҳам асосий роль ўйнайди. Шу маънода, Қатарнинг “Nebras Power” компаниясининг Ўзбекистон бозорига кириб келиши мамлакат энергетика инфратузилмасини ривожлантиришда муҳим қадам ва бошқа халқаро инвесторлар учун сигнал бўлгани таъкидланди.

Шунингдек, қўшма лойиҳалар портфели кенгайиб бораётгани маълум қилинди. Айни пайтда транспорт инфратузилмаси, кўчмас мулк, туризм, таълим, қишлоқ хўжалиги ва ахборот технологиялари соҳаларидаги ташаббуслар бўйича музокаралар олиб борилмоқда.

Нашрда таъкидланишича, Ўзбекистон инвестиция муҳитини изчил мустаҳкамламоқда. 2017 йилдан буён мамлакатимиз иқтисодиётига 100 миллиард доллардан зиёд хорижий инвестициялар жалб этилди. 2030 йилга бориб ялпи ички маҳсулотни икки баробарга ошириш мақсадига эришиш учун қарийб 200 миллиард доллар сармоя талаб этилади.

Рақамли иқтисодиётни ривожлантиришга алоҳида эътибор қаратилди. Қайд этилишича, “Web Summit 2025”да “Invest Qatar” билан эришилган келишувлар АКТ соҳасида барқарор ҳамкорликни шакллантириш учун асос бўлди. Ўзбекистон инвесторлар учун қулай шарт-шароитларга, жумладан, солиқ имтиёзлари ва хорижий компанияларни қўллаб-қувватлаш дастурларига эга минтақавий макон сифатида намоён бўлмоқда.

Дипломатнинг таъкидлашича, келгуси икки йилда томонлар сармоявий ҳамкорликни чуқурлаштириш, инфратузилма ва энергетика лойиҳаларини ривожлантириш, савдо ва логистика алоқаларини кенгайтириш, шунингдек, инновациялар, молия ва қишлоқ хўжалиги соҳаларида ҳамкорлик қилишга эътибор қаратади.