АНҚАРА, 15 апрель. /“Дунё” АА/. Туркия ёш тадбиркорлар уюшмаси – TÜGİADнинг Ўзбекистонда ўз ваколатхонасини очгани турк оммавий ахборот воситалари диққат марказида бўлди, деб хабар беради “Дунё” АА мухбири.

“Yeni Şafak” газетасининг ёзишича, TÜGİADнинг Тошкент шаҳрида очилган офиси Ўзбекистон билан савдо-иқтисодий муносабатларни янада ривожлантириш, туркий давлатлар ўртасида иқтисодий ҳамкорликни мустаҳкамлаш ҳамда ўзаро манфаатли ўсиш учун барқарор платформа яратишга қаратилган.

Ваколатхона очилиш маросимида сўзга чиққан TÜGİAD раиси Гюркан Йилдирим уюшманинг халқаро фаолияти кенгайиб бораётганини алоҳида таъкидлаган:

“Уюшмамизнинг байроғи нафақат Туркияда, балки дунёнинг муҳим стратегик савдо марказларида ҳам ҳилпирамоқда. Тошкентда очилган янги офисимиз орқали Марказий Осиёда, айниқса туркий республикалар ўртасида мустаҳкам иқтисодий кўприк яратмоқдамиз. Бизнинг мақсадимиз – АҚШдан Хитойгача чўзилган улкан ҳудудда туркий ишбилармонлик дунёсининг локомотивига айланишдир”.

Шунингдек, TÜGİADнинг Ўзбекистон билан алоқалар бўйича минтақавий координатори Жамол Эрсой янги ваколатхонанинг стратегик аҳамиятига тўхталиб ўтди. Унинг таъкидлашича, мазкур офис нафақат бизнес алоқаларини кенгайтириш, балки тарихий ва маданий жиҳатдан мустаҳкам биродарлик ришталарини иқтисодий ҳамкорликка айлантиришга хизмат қилади.

“Биз бу ҳудудга фақат бизнес мақсадида эмас, балки чуқур илдиз отган биродарлик алоқаларимизни иқтисодий кучга айлантириш ниятида келдик. Тошкентдаги ваколатхона нафақат Ўзбекистон, балки бутун Марказий Осиёдаги аъзоларимиз учун ишончли майдон бўлиб хизмат қилади. Шу билан бирга, у туркий давлатлар ўртасидаги савдо ҳажмини оширишга хизмат қилувчи муҳим кўприкка айланади”, – дея фикр билдирган Жамол Эрсой.